Eld­gosið í heimsmiðlunum: „Ís­land: Rýmt“

Undanfarin gos hefur vottað fyrir dvínandi áhuga heimsbyggðarinnar á íslenskum eldgosum en þó virðist sem heimsmiðlarnir þreytist aldrei á því þegar kynngimögnuð jarðaröflin minna á sig.

Á Norðurlöndunum er auðvitað fylgst vel með og hafa fréttir af eldgosinu verið ofarlega á síðum danska og norska ríkisútvarpsins í morgun sem og á VG sem slær fréttinni upp á þennan veg: „Ísland: rýmt.“

Í Svíþjóð fjallar Aftonbladet, Expressen og Dagens Nyheter um eldgosið þó það fái ekki stórt pláss á forsíðunum. Eldgosaþreytu er líklega farið að gæta að einhverju leyti á Norðurlöndunum vegna fréttaflutningsins úr Grindavík undanfarin ár.

Í Danmörku er fjallað um eldgosið á ríkisútvarpinu eins og fyrr segir en einnig í Berlingske og Jyllands-Posten.

Vestanhafs hefur gosið einnig vakið athygli. Fjallað er um það á tveimur helstu miðlum New York-borgar, Post og Times. Þá er einnig fjallað um eldgosið á Reuters, Al-Jazeera og Fox.