Senda konurnar í Evrópu­keppni en ekki karlana

Valur var eitt fjögurra karlaliða sem mátti taka þátt í Evrópukeppni á næsta tímabili en Hlíðarendamenn gáfu það frá sér. Karlalið FH, Fram og Stjarnan verða hins vegar öll með í Evrópukeppni.

Valsmenn urðu Evrópubikarmeistarar karla 2024 og hafa verið með í Evrópukeppni undanfarin áratug.

Handbolti.is fjallaði um þessa ákvörðun Vals og heyrði í Fannari Erni Þorbjörnssyni í stjórn handknattleiksdeildar Vals.

Hann segir stjórnina hafa tekið þá ákvörðun að skrá aðeins kvennalið félagsins til leiks á næstu leiktíð. Konurnar hafi unnið titla bæði hér heima og í Evrópubikarkeppninni í vor. Stefnan hafi verið sett á kvennaliðið verði með í Evrópudeildinni, sem er stigi ofan en Evrópubikarkeppnin.

„Þetta var bara ákvörðun félagsins að hafa þennan hátt og vera með fókus á kvennaliðinu. Liðið vann titla hér heima og einnig Evróputitil í vor. Karlaliðið hefur tekið þátt í Evrópukeppni í mörg ár í röð en pásar í eitt ár,“ sagði Fannar Örn í samtali við handbolta.is.

Ísland mátti senda fimm kvennalið í Evrópukeppni félagsliða en aukasæti fékkst vegna sigurs Vals í Evrópubikarkeppninni í vor. Þrjú þeirra stökkva á tækifærið en það eru auk Vals lið Hauka og Selfoss. Kvennalið Fram og ÍR afþökkuðu boðið.