Tíu ára kylfingur fór holu í höggi á Íslandsmóti

Ágúst Orri Arnarson skrifar 20. júní 2025 14:32

Júlí Róbert er ungur og efnilegur kylfingur úr Nesklúbbnum. GSÍ

Júlí Róbert Helgason, tíu ára gamall kylfingur úr Nesklúbbnum, fór fjórðu holuna á Landinu við Korpúlfsstaðavöll í aðeins einu höggi, á Íslandsmóti golfklúbba fyrir tólf ára og yngri í gær.

Júlí sló 113 metra höggið með tvinnkylfu númer fimm og er samkvæmt Golfsambandi Íslands „einn allra yngsti kylfingurinn til að fara holu í höggi á Íslandsmóti.“

Klippa: Tólf ára kylfingur fór holu í höggi

Pinninn var á miðri flöt fjórðu brautarinnar, sem liggur í talsverðum upphalla. Júlí sló lágan og þéttingsfastan bolta sem skoppaði fyrir framan flötina og stefndi til hægri í átt að flagginu.

Strax sást að höggið var gott en vegna hæðarmismunar sást ekki þegar boltinn small ofan í. Félagar Júlís hlupu á undan til að leita að boltanum og þegar hann sást ekki strax var kíkt ofan í holu, þar sem hann blasti við.

Mikil fagnaðarlæti brutust út og Júlí tók tilfinningarík skref að holunni áður en hann tók boltann upp. Nokkur gleðitár féllu á þessu frábæra augnabliki eins og sjá má í myndskeiðunum sem fylgja fréttinni.

Klippa: Tólf ára kylfingur fór holu í höggi

Golf Íslandsmótið í golfi