Frá martraðarbyrjun í draumaendi með mögnuðu sigurpútti

Þetta er fyrsti sigur Spaun á risamóti á ferlinum en þetta var 125. US Open mótið frá upphafi.

Rigning og rennblautur völlur setti mikinn svip á lokadaginn og það þurfti að gera hlé á keppninni vegna úrhellis. Það hafði slæm áhrif á suma kylfinga en ekki Spaun.

Það ótrúlega við sigur J.J. Spaun var að hann virtist vera búinn að klúðra þessu með martraðarbyrjun á lokhringnum.

Spaun fékk fimm skolla á fyrstu sex holunum og var kominn langt á eftir fremstu mönnum. Hann átti aftur á móti draumaendi á meðan allt fór úrskeiðis hjá þeim sem voru fyrir ofan hann.

Spaun náði fugli á bæði tólftu og fjórtándu. Skolli á fimmtándu skipti minna máli því allir voru í vandræðum í bleytunni. Kylfingar töpuðu hverju höggina á fætur öðru og það voru vandræði á öllum holum. Spaun hélt hins vegar haus og kláraði glæsilega.

Spaun endaði hringinn með því að fá fugl á sautjándu og setti síðan niður tuttugu metra pútt á átjándu til að fá fugl á henni líka.

Honum hefði nægt að tvípútta en frábætt pútt hans fór alla leið í holuna við gríðarlega fögnuð Spaun og kylfusveins hans. Hér fyrir neðan má sjá sigurpúttið.

„Ég vissi frá því sem áhorfendur voru að segja að mér nægði að tvípútta til að vinna. Ég vildi samt ekki skoða það því ég vildi ekki spila varfærnislega. Ég ætlaði ekki að gera neitt heimskulegt og passaði mig á koma mér ekkert í eitthvað þrípútt og vesen,“ sagði J.J. Spaun.

„Ég var bara í sjokki og trúði því varla að kúlan fór í holu og þetta væri búið,“ sagði Spaun. Hann átti erfitt með tilfinningar sínar eftir að sigurinn var í höfn. Þurrkaði tárin hvað eftir annað úr augunum og var síðan fljótlega kominn með dóttur sína í fangið.

Spaun endaði á því að spila hringina fjóra á 279 höggum eða einu höggi undir pari. Hann var sá eini í mótinu sem spilaði á undir pari. Hann fær 4,3 milljónir dollara fyrir sigurinn eða 538 milljónir króna. Það er það langmesta sem hann hefur fengið í verðlaunafé á ferlinum.

Skotinn Robert MacIntyre varð í öðru sæti tveimur höggum á eftir en hann átti einnig mjög góðan endakafla á hringum. Hann og Spaun voru eiginlega þeir einu sem spiluðu vel eftir að rigningarhléið.

Norðmaðurinn Viktor Hovland varð þriðji, lék á tveimur höggum yfir pari, eða á þremur höggum meira en sigurvegarinn.