Raf­magn komið á aftur

Rafmagnslaust varð víða á Suðurlandi í morgun, á Hellu, Hvolsvelli, í Rimakoti, Vestmannaeyjum og nærsveitum, eftir að Hvolsvallarlína 1 leysti út laust fyrir klukkan 10 í morgun.

Í uppfærðri tilkynningu á vef Landsnets segir að um hafi verið að ræða slitna bugt á Hvolsvallarlínu 1 við Ytri-Rangá. 

Rétt fyrir klukkan 13 hafi viðgerð verið lokið og undirbúningur hafinn við spennusetningu. Upp úr klukkan 13 hafi rafmagn verið komið á alla afhendingarstaði Landsnets og truflun hjá Landsneti því lokið.