Sektaðar fyrir að trassa með verð­merkingar á Sel­fossi

Stjórnvaldssektirnar nema á bilinu 50 til 100 þúsund krónum, en verslanirnar sem um ræðir eru snyrtistofan Metta og verslanir Motivo, Dýraríkið, Fröken Selfoss og Árvirkinn.

Samkvæmt svörum frá Neytendastofu hefur ekki tekist að birta forsvarsmönnum sjötta fyrirtækisins ákvörðunina og verður því beðið með að birta hana á vef Neytendastofu þar til að það hefur tekist.

Á vef Neytendastofu segir að gerð hafi verið skoðun á ástandi verðmerkinga hjá 48 seljendum og þjónustuveitendum á Selfossi.

„Í verðmerkingareftirliti er skoðað hvort söluvörur eru verðmerktar, hvar sem þær eru sýnilegar eða aðgengilegar neytendum. Einnig er skoðað hvort að verðskrá yfir framboðna þjónustu sé sýnileg.

Í verðmerkingareftirliti Neytendastofu gerðu starfsmenn stofnunarinnar athugasemdir við verðmerkingar í 16 verslununum þar sem ástand verðmerkinga var ábótavant og hvatti stofnunin til úrbóta. Skoðuninni var að lokum fylgt eftir með annarri heimsókn.

Neytendastofa hefur nú sektað sex fyrirtæki sem höfðu ekki gert fullnægjandi úrbætur á verðmerkingum þegar skoðuninni var fylgt eftir,“ segir í tilkynningunni.