Mótor­hjóla­samtök að­stoða börn sem hafa orðið fyrir of­beldi

Samtökin voru stofnuð í Utah í Bandaríkjunum árið 1995 af klínískum félagsráðgjafa sem hafði starfað í 20 ár með börnum sem höfðu mátt þola misnotkun eða ofbeldi.

Ráðgjafinn var meðvitaður um hin ýmsu úrræði sem hið opinbera hafði upp á að bjóða fyrir börnin, en honum fannst vanta úrræði sem gæti tryggt öryggi barnsins allan sólarhringinn.

Vinna með vitund lögreglu og barnaverndar

Íslandsdeild samtakanna byrjaði árið 2014 en varð fullgildur meðlimur BACA árið 2016.

Á heimasíðu neyðarlínunnar segir að til þess að falla að skilyrðum B.A.C.A. þurfi mál að hafa verið tilkynnt til lögreglu eða barnaverndar.

Þegar einhver verður meðlimur í samtökunum tekur hann upp viðurnefni (Road name) sem viðkomandi notar alfarið í störfum sínum fyrir samtökin. Ash, Bones, og Mickey Diesel eru félagar í samtökunum á Íslandi.

Ash segir að samtökin snúist um að efla og styðja börn sem hafa orðið fyrir ofbeldi.

„Þetta eru börn þannig forráðarmaður verður að vera með í þessu. Þau senda hjálparbeiðni og þá fer barnatengiliður af stað, metur hvort málið sé tækt fyrir BACA og undirbýr aðkomu okkar ef við á.“

„Svo förum við í fyrstu heimsókn, þar sem við kynnum okkur fyrir barninu, og spyrjum hvort þau vilji að við komum inn í þeirra líf. Vilji börnin það fá þau svo að velja sér vesti og road name,“ segir Ash.

Mál sem samtökin sinna eru flokkuð í tvo flokka, stig eitt og stig tvö, eða „Intervention level 1” og„Intervention level 2.“

Ash segir að stig eitt sé þegar börnin eru tekin inn í samtökin, börnum sé boðið upp á nærveru og félagsskap þegar þau óska eftir því og þar fram eftir götunum.

Barnið fær svo tvo stuðningsfulltrúa frá samtökunum sem vinna náið með barninu, og barnið fær símanúmer þeirra beggja og getur haft beint samband við þá hvenær sem er sólarhrings.

Ash segir að ákveðin athöfn fari af stað þegar börn eru boðin velkomin í hópinn.

„Við mætum þá á fyrirfram ákveðinn stað, hittum barnið og fjölskylduna og afhendum vestið. Við bjóðum því svo að fara á rúnt á mótorhjóli og þeim er svo úthlutað þessum stuðningsfulltrúum. En ef barninu líst ekki á einhvern fultrúa er bara valinn nýr.“

Hafa fylgt börnum í réttarsal og skóla

Stig tvö sé virkjað þegar raunveruleg ógn er til staðar.

„Þá fer í gang aðgerðaráætlun, og við erum alltaf til staðar fyrir barnið,“ segir Mickey.

Mickey segir að samtökin starfi með vitund opinberra aðila sem sinna þessum málum. Lögreglan vísi í sumum tilfellum á BACA, og eitt fyrsta mál samtakanna á Íslandi hafi til að mynda komið frá Kvennaathvarfinu árið 2016.

Hann segir það hafa komið fyrir að börnum sé fylgt í réttarsal eða skóla.

„Við höfum fylgt börnum í skóla ef það er umsátursástand, ef gerandinn er laus.”

Þegar spurt er hversu margir séu í samtökunum er svarið á þá leið að aldrei megi spyrja mótorhjólasamtök að slíku.

„Við erum fleiri en tíu en færri en hundrað. Það er svarið. Nógu margir en gætu verið fleiri,“ segir Mickey.

Árlegur fjáröflunarakstur á laugardaginn

BACA fara árlega í 100 mílna fjáröflunarakstur sem yfirleitt er farinn á vorin. Stefnt er að því að aksturinn í ár verði laugardaginn næstkomandi 17. maí.

Ferðin er hugsuð sem fjáröflunarleið fyrir samtökin, en þau sem taka þátt greiða vægt þátttökugjald sem rennur óskipt til samtakanna. Hver sem er getur tekið þátt í ferðinni.

Samtökin eru skráð sem góðgerðarsamtök og öll vinna er sjálfboðaliðastarf.

Mickey segir að þátttakan í þessari árlegu ferð hafi verið allavegana í gegnum tíðina.

„Þetta fer svolítið eftir veðrinu. Við höfum fæst fengið 3 - 4 með okkur. En í stærstu ferðinni okkar voru fleiri en 100 hjól. Við eigum mjög trygga stuðningsmenn sem koma hvernig sem viðrar,“ segir hann.

Mickey segir að alltaf sé hægt að leggja samtökunum lið, og sumir styrki samtökin með beinum hætti.

Þá standi samtökin að fleiri árlegum viðburðum.

„Við höldum hjólaball á hverju ári í desember eða nóvember. Þá eru veitingar og það er trallað, sungið og spilað, og við dönsum í kringum hjólatréð. Svo höfum við verið með sumarhátíð líka og þetta hefur verið mjög vinsælt,“ segir Mickey Diesel.