Metfjöldi á Aldrei fór ég suður: „Þetta var al­gjör draumur“

„Þetta var algjör draumur. Ég er ekki ennþá búinn að klípa mig nógu fast til að fatta hvað þetta gekk vel allt saman,“ segir Kristján Freyr Halldórsson, rokkstjóri Aldrei fór ég suður, þegar blaðamaður bjallaði í hann.

„Ég er í skýjunum. Ég er svo stoltur af öllum gestum hátíðarinnar.“

„Þrátt fyrir mjög herta öryggisgæslu á svæðinu, við vorum tilbúin fyrir allt saman, þá voru bara allir það sem þau gera best að skemmta sér fallega í sátt og samlyndi við næsta mann og konu,“ segir Kristján.

Hlynur Snorrason, yfirlögregluþjónn á Vestfjörðum, tekur undir orð Kristjáns. Ekkert mál kom upp í tengslum við hátíðina auk þess sem lögregla þurfti ekki að hafa afskipti af neinum bílstjórum undir áhrifum áfengis eða fíkniefna.

Metfjöldi manns í skemmunni

„Ef það er eitthvað sem að við höfum lært á síðustu árum þá finnst mér, án þess að vera væminn eða meyr, gestir okkar á Aldrei fór ég suður bestu gestir í heimi. Við höfum boðið upp á alls konar og það er ekki sjálfgefið að fólk þekki alltaf öll nöfnin sem koma fram,“ segir Kristján.

Í gærkvöldi steig hljómsveitin Geðbrigði fyrst á svið en fjórmenningarnir í sveitinni sigruðu Músíktilraunir á dögunum. Á eftir þeim tók við vestfirski tónlistarmaðurinn Gosi auk hljómsveitar.

„Það eru kannski ekki mörg sem hafa séð til þeirra en það var stappfull skemman og frábærar viðtökur. Þau voru gjörsamlega í skýjunum.“

Auk Geðbrigði og Gosa stigu á svið tvíeykið JóiPé og Króli. Þá tók hljómsveitin Múr nokkur lög en hún var nýverið útnefnd Bjartasta vonin í íslensku tónlistarlífi á Íslensku tónlistarverðlaununum. Írafár hélt uppi stuðinu og Apparat Organ Quante stigu síðastir á svið í fjölmennri skemmunni.

„Við vorum að horfa á það núna að við myndum ekki fá jafn marga gesti og í fyrra,“ segir Kristján en þá var tuttugu ára afmæli hátíðarinnar en þá var mikill fjöldi gesta í bænum.

„Ég held við höfum verið að sprengja enn og aftur skala í gær,“ segir hann.

Gestir hátíðarinnar voru mættir snemma í gær á svæðið enda blíðviðri á svæðinu og komu skipuleggjendur bekkjum og stólum þar sem fólk sat í makindum.

„Það voru allir niður frá og við höfum ekki séð svona fjölda áður.“

Hann býst við alveg jafn mörgum gestum í skemmunni á Ísafirði í kvöld. Fyrst á svið verður Amor Vincit Omnia, poppdúett sem hefur komið á harðastökki inn í íslensku raftónlistarsenuna.

„Þessi dúett fær örugglega nokkur þúsund ný eyru og nýja aðdáendur í kvöld.“

Vestfirska söngkonan Salóme Katrín stígur á svið og þar á eftir Una Torfa. Hljómsveitin Reykjavík! tekur við en síðast þegar hljómsveitin spilaði á Aldrei fór ég suður árið 2012 var trúlofun á sviðinu. Lokaatriði hátíðarinnar er í höndum FM Belfast sem hefur komið áður við sögu á hátíðinni, síðast fyrir tveimur árum.

Vonandi endi einhver í sjóklæðum með sjómannsgítarinn

Líkt og alltaf kostar ekkert að mæta á hátíðina heldur er hún opin öllum. Í stað þess fer fram fjáröflun, til að mynda sala á fatnaði merktum hátíðinni og uppboð á sérstökum vörum. Í ár er hægt að bjóða í hettupeysu áritaða af öllu tónlistarfólki hátíðarinnar, hlýrabol sem söngkonan Birgitta Haukdal áritaði og svokallaður Sjómannsgítarinn, einnig áritaður af tónlistarfólkinu.

Fyrir hátíðina í ár var merkið hennar tekið í gegn og sjómaðurinn, sem hefur einkennt merki hátíðarinnar, látinn halda á gítar ólíkt fyrri merkjum.

„Það var maður sem að hringdi og var svo ánægður með nýja ásýnd hátíðarinnar. Viðkomandi hringdi og sagði ég á alveg eins gítar og sjóarinn ykkar hérna og ég ætla að gefa ykkur hann. Getið þið ekki bara boðið hann upp til í fjáröflun?“ segir Kristján.

„Það verður vonandi einhver sem endar í sjóklæðum og með gítar eins og í merkinu okkar í kvöld.“

Kristján er fullur tilhlökkunar fyrir kvöldinu og hátíðinni en hans helsta von er að allir skemmti sér vel og fallega.

„Ef fólk vill virkilega styðja við bakið á okkur er það að fólk skemmti sér fallega á svæðinu og brosi til náungans sér við hlið. Það er það besta sem að við viljum að gerist á hátíðinni.“