Stökk ó­vænt til á HM: „Mér var al­veg sama“

Valur Páll Eiríksson skrifar frá Zagreb

Sveinn kom inn í hópinn fyrir Arnar Frey Arnarsson sem meiddist í æfingaleik Íslands við Svíþjóð um helgina. Sveinn var á leið frá Íslandi heim til Noregs, hvar hann spilar með liði Kolstad, þegar hann fékk símtal frá landsliðsþjálfaranum.

„Ég var bókstaflega að labba inn í flugvél. Þá fæ ég símtal. Þá var ég búinn að sjá að Arnar hefði meiðst í leiknum og maður gerði sér vonir um að kallið væri að koma. Svo kom kallið og þá var flugvélin eiginlega byrjuð að keyra út á flugbraut þannig að það var ekki aftur snúið,“ segir Sveinn sem þurfti því að fara heim áður en hann gat komið til móts við landsliðið í Svíþjóð.

„Við skutumst heim ég og konan til Þrándheims og náðum í dót, umpökkuðum í töskunum og svo bara af stað aftur í fyrramálið,“ segir Sveinn. En var þetta ekki hektískt allt saman?

„Ég fór frá Þrándheimi til Kristianstad í Svíþjóð fyrst. Hektískir og ekki hektískir, maður er bara klár þegar landsliðið kallar. Mér var alveg sama hvort ferðalagið yrði langt eða stutt eða maður væri þreyttur. Það skiptir engu máli, maður er bara klár og bara frábært að fá kallið í landsliðið. Það er það sem mann dreymir um,“ segir Sveinn.

Fjölnismenn mætast á HM

Hafsteinn Óli Berg Ramos Rocha var kallaður inn í leikmannahóp Grænhöfðaeyja í vikunni en Ísland mætir Grænhöfðaeyjum í fyrsta leik mótsins á morgun. Hafsteinn heilsaði upp á íslensku strákana í þann mund sem viðtalið við Svein var tekið og áttu þeir gott spjall.

Þeir félagar eru Fjölnismenn og ekki á hverjum degi sem tveir Grafarvogsbúar mætast á heimsmeistaramóti.

„Við erum náttúrulega báðir uppaldir í Fjölni. Það er gaman að það séu tveir leikmenn uppaldir í Fjölni á heimsmeistaramótinu í handbolta. Við þekkjumst þaðan, spiluðum saman mikið. Hann er fínn strákur, við erum góðir félagar,“

Ætla að vinna riðilinn

Sveinn segir þá markmið íslenska liðsins skýrt. Stefnt sé að því að vinna leikina þrjá í riðlinum, við Grænhöfðaeyjar, Kúbu og Slóveníu og fara með fullt hús stiga í milliriðil.

„Við ætlum að vinna riðilinn. Það er númer eitt, tvö og þrjú. Við eigum að geta gert það en það krefst þess að við mætum eins og menn til leiks. Maður veit það sjálfur að það er miklu meiri stemning í því að mæta og klára þessa leiki eins og fagmenn og gera litlu smáatriðin vel. Þá fer maður sáttur frá borði sem hefur áhrif á fílinginn í framhaldinu,“ segir Sveinn.

„Þetta er bara handbolti, þetta er bara basic“

Sveinn leikur sem línumaður en hefur verið inn og út úr landsliðshópnum að undanförnu en tók þó þátt í síðasta verkefni í nóvember. Hann segir örlitla vinnu fylgja því að ná tengingu við þá sem leika fyrir utan bardagalínuna en er bjartsýnn á gott samstarf.

„Ég er duglegur að tala við gæjana sem eru fyrir utan, Aron [Pálmarsson] og Gísla [Þorgeir Kristjánsson] og alla þessa gæja til að fá fíling fyrir hvorum öðrum. Ég hef engar áhyggjur af því, þetta er bara handbolti, þetta er bara basic. Maður er bara með eitthvað kerfi sem er spilað meira og minna allsstaðar,“

„En þetta er aðallega að þekkja hvorn annan, hvað fíla ég, hvað fílar hann og hvað vill hann. Línumaður og útileikmaður þurfa að hafa ákveðna tengingu, auðvitað tekur smá tíma að byggja það upp en við erum bara duglegir að eiga samskipti og þá verður það allt í góðu,“ segir Sveinn sem er harðákveðinn í því að grípa tækifærið sem gefst á komandi móti báðum höndum.

„Alveg klárlega. Það er engin spurning. Nú er tíminn kominn og ég ætla að grípa þetta.“

Leikur Íslands og Grænhöfðaeyja er klukkan 19:30 annað kvöld. Strákunum okkar verður fylgt vel á eftir á Vísi, Stöð 2 og Bylgjunni fram að leik.