Mest lesið í sportinu: Hlaupa­drottningar, strákarnir okkar og hneyksli á ÓL

Sérstaklega virðist Mari Järsk hafa unnið sig inn í hug og hjörtu þjóðarinnar með sínu opna, skemmtilega og einlæga fasi. Viðtal við hana eftir sigur í Bakgarðshlaupinu í Öskjuhlíð í vor, þar sem hún hljóp tæplega 382 kílómetra, vakti mikla athygli. 

Það gerði einnig viðtal við Elísu Kristinsdóttur, einstæða móður í fullu starfi sem hleypur yfir 100 kílómetra í viku og varð í 2. sæti hlaupsins í vor, og viðtal við Rakel Maríu Hjaltadóttur sem rann illa í hálku á HM landsliða í bakgarðshlaupi í október.

Fréttir tengdar strákunum okkar á stórmótum í handbolta vekja jafnan athygli en vinsælasta fréttin af EM í Þýskalandi í janúar var vegna ummæla Alfreðs Gíslasonar, þjálfara Þýskalands, eftir að Þjóðverjar klúðruðu íslenska þjóðsöngnum fyrir leik þjóðanna í Köln.

Dramatíska jafnteflið gegn Serbíu í fyrsta leik Íslands á EM fékk lesendur einnig til þess að sökkva sér ofan í greinar um þann leik.

Þá opnaði landsliðsmarkvörðurinn Björgvin Páll Gústavsson sig með sínum einstaka hætti í þríleiknum „Ekki bara leikur“ í hlaðvarpinu Besta sætið, sem birtist á Vísi.

Mest lesna heimsfréttin sneri að þátttökku hinnar alsírsku Imane Khelif í hnefaleikum á Ólympíuleikunum í París. Ítalskur andstæðingur hennar bar sig aumlega eftir tap í bardaga þeirra. Falskar fullyrðingar um að Khelif væri í raun karlmaður breyttu því ekki að Khelif varð Ólympíumeistari kvenna í veltivigt.

Sömuleiðis vakti mikla athygli á Ólympíuleikunum þegar hlaupadrottningin Shelly-Ann Fraser-Pryce komst ekki í tæka tíð inn á keppnissvæðið fyrir undanúrslit í 100 metra hlaupi, og þegar getnaðarlimur Frakkans Anthony Ammirati skemmdi fyrir honum í stangarstökki.

Pétur Marteinsson er löngu hættur að spila fótbolta en hann er svo sannarlega ekki gleymdur hjá stuðningsmönnum Hammarby eins og sýndi sig á grannaslag við Djurgården í sumar. Stuðningsmennirnir höfðu þá útbúið risastóran fána með mynd af eftirminnilegu atviki þegar Pétur lét leikmann Djurgården gjörsamlega heyra það, eins og fjölmargir lesenda Vísis lásu um.

Það vakti líka athygli þegar Alexandra Hafsteinsdóttir hætti sem aðstoðarþjálfari U18-landsliðs kenna í íshokkí, vegna óánægju með Íshokkísambandið sem hún sakaði um að taka of laust á kynþáttaníði.

Netflix-bardagi Mike Tyson og Jake Paul vakti mikla athygli hér eins og víða um heim, og það gerðu einnig fréttir af því að Michael Schumacher hefði sést á meðal fólks, í brúðkaupi dóttur sinnar á Spáni.

Knattspyrnumaðurinn Albert Guðmundsson var mikið í fréttum, þó ekki væri það bara vegna magnaðrar frammistöðu sinnar í ítölsku A-deildinni með Genoa á síðustu leiktíð. Frétt um viðbrögð Alberts við ummælum framkvæmdastjóra Genoa, sem sakaði Albert um að hafa hálfvegis neytt félagið til að leyfa honum að fara til Fiorentina í sumar, var mikið lesin.

Nýjasta greinin á listanum yfir þær mest lesnu á árinu er viðhorfspistill Vals Páls Eiríkssonar, íþróttafréttamanns á Stöð 2 og Vísi, sem fór yfir þá niðurstöðu að HM í fótbolta fari fram í Sádi-Arabíu árið 2034.