Alls 914 um­sóknir um uppkaup í Grinda­vík sam­þykktar

Þetta kemur fram í skýrslu fjármála- og efnahagsráðherra um aðgerðir fyrir Grindvíkinga í kjölfar eldsumbrota á Reykjanesskaganum sem birt var á vef Alþingis í gær. Þar kemur jafnframt fram að gert sé ráð fyrir því að kostnaður við uppkaup fasteigna í sveitarfélaginu muni kosta ríkið um 75,3 milljarða og að heildarkaupverð 900 fasteigna sem félagið hefur þegar keypt er 68,9 milljarðar.

Fasteignafélaginu Þórkötlu hefur borist 17 umsóknir um hollvinasamninga frá fyrrverandi eigendum eigna í Grindavík. Samkvæmt samningunum fær fólk aðgang að húsinu, getur notað það sem geymslu en þarf að sjá um eftirlit í húsnæðinu og greiðir fyrir það 30 þúsund krónur á mánuði. Hægt er að sækja um sölu á húsnæðinu þar til í mars á næsta ári. Í skýrslu ráðherra kemur fram að 10. nóvember á þessu ári höfðu 948 umsóknir um kaup á íbúðarhúsnæði borist.

Félagið skiptir umsóknum í almennar umsóknir annars vegar og frávika umsóknir hins vegar. Af þeim 948 umsóknum sem teknar hafa verið til meðferðar eru 836 almennar umsóknir og 112 umsóknir með frávik hvers konar. Fram kemur í skýrslunni að frávikin séu af ýmsu taki, en svo sem umsóknir sem falla utan gildissviðs laganna, álitamál um hvort tímabundnar aðstæður skýri að lögheimili er ekki skráð í íbúðarhúsnæði, önnur veðbönd en húsnæðislán eru áhvílandi, röng skráning á byggingarstigi, óskað er eftir undanþágu fyrir lögheimilisskilyrðinu og fleira.

Undanþága á 46 eignum

Alls hafa 914 umsóknir verið samþykktar og þegar verið gengið frá 906 kaupsamningum. Afhending hefur farið fram í 822 tilvikum og 775 afsöl verið undirrituð.

Þá segir að í skýrslunni hafi í nóvember í fyrra alls 73 eignir verið í eigu einstaklinga sem ekki höfðu lögheimili í þeim. Samkvæmt reglum Þórkötlu var því ekki hægt að kaupa þessar eignir. Brunabótamat þessara eigna var metið um fimm milljarðar. Í skýrslu ráðherra kemur fram að gerðar hafi verið undanþágur á 46 eignum þar sem fallist var á að tímabundnar aðstæður hafi skýrt lögheimilisskráningu eiganda annars staðar. Þá kemur einnig fram að þann 10. nóvember, á þessu ári, hafði félagið hafnað fimm umsóknum á þeim grundvelli að umsækjandi hefði ekki verið með skráð lögheimili í eigninni 10. nóvember 2023. 

„Í þeim tilvikum gat umsækjandi ekki sýnt fram á að tímabundnar aðstæður skýri að hann var ekki með skráð lögheimili í íbúðarhúsnæðinu þann dag,“ segir í skýrslunni og að félagið hafi enn til meðferðar 13 umsóknir þar sem talið er að sömu aðstæður eigi við. Áætlað kaupverð þessara 18 eigna er samtals um 850 milljónir króna.

Þá kemur fram að í nóvember hafi verið gerðar breytingar á heimild til að víkja frá skilyrði um lögheimili í húseign og því gert ráð fyrir að sú breyting muni hafa áhrif í þeim málum sem eru í meðferð.

Í skýrslunni segir einnig að í fyrra, þann 10. Nóvember, hafi alls 81 einstaklingur átt eignarhlut í fleiri en einni eign í Grindavík. Af þeim hafi 61 átt 50 prósent eða meira í eign. Eignirnar hafi verið alls 92 og brunabótamat þeirra verið 8,4 milljarðar.

Þá kemur einnig fram að í heildina séu 197 íbúðir í eigu lögaðila innan þéttbýliskjarna Grindavíkur og að brunabótamat þeirra sé metið 11 milljarðar. Af þeim eru 31 eign í eigu Grindavíkurbæjar með brunabótamat upp á einn milljarð og þá séu alls 304 eignir í Grindavík sem flokkist sem atvinnuhúsnæði. Brunabótamat þeirra sé 63 milljarðar. Þá séu einnig 30 eignir í eigu búsetufélagsins Búmanna með brunabótamat sem nemur 1,6 milljarða.

Færri sem þiggja leigustuðning

Í skýrslunni er einnig fjallað um leigustuðning og hversu margir þiggja hann. Samkvæmt upplýsingum frá Húsnæðis- og mannvirkjastofnun (HMS) hafa 1.357 umsóknir um sértækan húsnæðisstuðning verið afgreiddar að fjárhæð 1,8 milljarða króna til og með október 2024. Meðalfjöldi þeirra heimila sem fengu stuðning var 687 heimili á mánuði.

Mestur var fjöldinn í apríl, alls 901 heimili, en þeim hefur farið fækkandi síðan og voru 571 í október síðastliðnum sem þáðu stuðning. Af þeim áttu 426 fasteign í Grindavík og af þeim höfðu 193 keypt fasteign á árinu

Alls höfðu 1.131 fengið stuðning einhvern tíma á árinu og átt fasteign í Grindavík og af þeim voru 854 kaupendur að fasteign á árinu. Sértækur húsnæðisstuðningur stendur til boða út mars 2025.