Fjöl­mennt á sam­stöðu­fundi for­eldra leikskóla­barna á Sauð­ár­króki

Í tilkynningu segir að tilgangur fundarins hafi verið að fá áheyrn byggðarráðs Skagafjarðar vegna yfirstandandi verkfalls leikskólakennara í Ársölum á Sauðárkróki. Þá var þeim einnig afhentur undirskriftalisti með áskorun á sveitarstjórn að þrýsta á að samningar verði kláraðir.

147 undirskriftir

Þá var sveitarstjórnarfólk einnig minnt á að standa við eldra samkomulag síðan 2016 um jöfnun launa milli opinberra starfsmanna og almenna markaðarins. Þegar listinn var afhentur voru komnar 147 undirskriftir.

Í tilkynningu segir að nokkrir hafi tekið til máls á fundinum. Fyrst hafi Gunnþórunn Elíasdóttir boðið alla velkomna og þakkað Sigfúsi Inga Sigfússyni sveitarstjóra og byggðarráði fyrir að gefa viðstöddum tíma sinn.

Á fundinum voru Gísli Sigurðsson formaður byggðarráðs, Einar Eðvald Einarsson varaformaður, Jóhanna Ey Harðardóttir aðalmaður og Sigurlaug Vordís Eysteinsdóttir varamaður áheyrnarfulltrúa.

Næst tók til máls Lilja Gunnlaugsdóttir þar sem hún skoraði sveitarstjóra og meðlimi byggðarráðs að þrýsta á samninganefnd SÍS að standa við gefin loforð frá 2016 og tryggja jöfnun launa á vinnumarkaði. Hún sagði einnig kominn tíma til viðhorfsbreytinga í samfélaginu, í stað þess að líta á skólakerfið sem bagga mætti líta á það sem fjárfestingu.

Kennurum langi að vera í vinnu

Að lokum lagði Ásbjörg Valgarðsdóttir leikskólakennari orð í belg og sagði verkfallið líka hafa áhrif á leikskólakennara, þá langi mun frekar að vera í vinnunni með börnunum en að vera heima í verkfalli. Hún benti einnig á að leikskólinn væri vel mannaður af fagmenntuðu starfsfólki og skoraði á deiluaðila að ganga frá samningum.

Í tilkynningu segir að Sigfús Ingi Sigfússon sveitarstjóri og Gísli Sigurðsson hafi svo þakkað fyrir samtalið. Þeir hafi tekið undir áhyggjur viðstaddra og sögðu alla sammála um að staðan væri alvarleg. Gísli sagði að þau myndu gera sitt til að þrýsta á samninganefnd SÍS að ganga til funda og leysa þetta mál. Þá sagði Sigfús það staðfesta að samninganefndir myndu hittast á fundi í dag hjá ríkissáttasemjara.

MR bættist við í gær

Níu leik-, grunn- og framhaldsskólar hafa verið í verkfalli frá 29. október en Menntaskólinn í Reykjavík bættist í hópinn í gær og stendur til 20. desember. Þeim fjölgar svo um þrjá 25. nóvember næstkomandi en þá leggja kennarar við Árbæjarskóla, Garðaskóla og Heiðarskóla niður störf einnig.