Kvarta til um­boðs­manns Al­þingis vegna blóðmerahalds

Þann 22. október síðastliðinn lagði Katrín Oddsdóttir lögmaður þrennra dýraverndunarsamtaka fram beiðni til umboðsmanns Alþingis vegna stjórnsýslunnar í kringum blóðmerahald sem samtökin segja að virki ekki til að vernda dýrin. Katrín segir að umboðsmaður Alþingis hafi nú formlega samþykkt beiðnina og að málið sé nú komið með málsnúmer. Umboðsmaður segir hins vegar beiðnina til skoðunar sem ljúki að jafnaði fjórum vikum eftir að kvörtun berst.

„Þessi dýraverndunarsamtök kæra til lögreglunnar meint dýraníð eftir að síðast var tekið upp ofbeldi gegn hryssum við blóðtöku en til þess að lögregla geti kært það þá verður MAST að ákveða að málið skuli sæta kæru en MAST telur að það sem sjáist á þessum upptökum sé ekki nægilega alvarlegt til þess að leyfa lögreglunni að rannsaka málið sem dýraníð og við getum ekkert kært þá ákvörðun neitt, sem er mjög, mjög undarlegt.“

Það sé vegna þess að dýraverndunarsamtökin séu ekki aðilar máls.

„Þetta er einsdæmi í íslenskri stjórnsýslu af því hér er almenna reglan sú að allar ákvarðanir sæti alltaf endurskoðun, það sé alltaf hægt að fá einhvern til að skoða hvort það mátti eða mátti ekki taka tiltekna ákvörðun í stjórnsýslunni.“

Katrín segir að umboðsmaður hafi brugðist við erindinu af krafti.

„Það er verið að óska eftir frekari gögnum og svo framvegis þannig að það er greinilega verið að vinna í þessu hjá umboðsmanni sem er gríðarlega góðar fréttir því hefði það ekki verði hægt þá hefði það verið lokapunkturinn yfir i-ið í því algjöra úrræðaleysi sem er í boði hjá íslenskum stjórnvöldum varðandi illa meðferð á dýrum.“

Í kvöldfréttum Stöðvar 2 á sunnudag birtist áður óbirt myndefni sem tekið var á sex mismunandi sveitarbæjum á Íslandi á síðasta blóðtökutímabili í september. Þar sást bóndi ítrekað sparka í hryssurnar.

„Þetta er svo alvarleg staða. Það er verið að beita þessi dýr talsverðu ofbeldi, að mínu mati, án þess að það sé búið að fara í gegnum þær reglur sem á að fara í gegnum í svona dýrahaldi og í raun virðist engin stjórnsýslustofnun né matvælaráðuneytið geta tekið á því þegar kemur upp ill meðferð inni í þessari blessuðu blóðmerahaldsiðju sem fyrir er ansi vafasöm, í besta falli.“

Í skriflegu svari frá umboðsmanni Alþingis við fyrirspurn fréttastofu segir kvörtun frá Katrínu hafa borist og hún fengið málsnúmer.

„Það eitt leiðir þó ekki til þess að hún verði tekin til nánari athugunar. Það er til skoðunar núna og slíkri skoðun er að jafnaði lokið innan fjögrra vikna frá móttöku kvörtunar,“ segir í svari umboðsmanns.

„Ef umboðsmaður telur að kvörtun gefi ekki nægilegt tilefni til nánari athugunar eða ekki eru skilyrði til frekari umfjöllunar af hans hálfu er viðkomandi sent bréf þess efnis með skýringum á ástæðum þess. Ef umboðsmaður ákveður hins vegar að taka mál til nánari athugunar skýrir hann viðkomandi stjórnvaldi frá efni kvörtunar jafnframt því sem hann óskar, eftir atvikum, eftir upplýsingum og gögnum og gefur stjórnvaldinu kost á að setja fram skriflegar skýringar.Stjórnvaldinu er þá veittur svarfrestur sem er að jafnaði tvær til sex vikur eftir eðli og umfangi máls. Sá sem hefur borið fram kvörtun fær afrit af því bréfi og er þannig upplýstur um framgang málsins.“

Fréttin hefur verið uppfærð með svörum umboðsmanns Alþingis.