Barnið þriggja vikna þegar mamman kom inn á og varð sænskur meistari

Emma Berglund fékk að koma inn á sem varamaður í lok leiks og verða um leið sænskur meistari í áttunda skiptið á ferlinum.

Hún missti af öllu tímabilinu vegna óléttunnar en þökk sé Guðrúnu og félögum þá vann Rosengård deildina með yfirburðum.

Rosengård var líka að kveðja hina 39 ára gömlu Caroline Seger sem spilaði sinn síðasta leik í sigrinum í gær.

Það vakti þó mikla athygli þegar nýja mamman fékk að koma við sögu undir og þar með að taka þátt í þessum titli. Berglund er líka sannkölluð goðsögn enda búinn að vinna sænska titilinn sjö sinnum áður með Umeå, Rosengård og Kopparbergs/Göteborg.

Hin 35 ára gamla Berglund eignaðist soninn Oliver 21. október síðastliðinn.

„Hann verður þriggja vikan á mánudaginn,“ sagði Emma Berglund við Aftonbladet eftir leikinn.

Hún kom inn á í uppbótatíma. „Við getum kallað þetta endurkomu. Ég viðurkenni að ég var stressuð á bekknum. Við grínuðumst með þetta á tímabilinu ekki síst þegar gekk svona vel. Ég er mjög ánægð með að fá að upplifa þetta,“ sagði Berglund.

En mun þetta telja sem hennar áttundi meistaratitill?

„Já ég vona það virkilega. Það var ástæðan fyrir þessu. Hvort sem er, þá mun ég alltaf telja hann með,“ sagði Berglund. Þetta var jafnframt hennar síðasti leikur á ferlinun og þökk sé Rosengård þá fékk hún að enda hann á afar skemmtilegan hátt.