Hor­yn nýr for­stjóri kísil­verk­smiðjunnar á Bakka

Í tilkynningu frá PCC er sagt að Horyn sé öllum hnútum kunnugur í bæði verksmiðjunni og iðnaðinum í heild eftir fimmtán ára starf í þungaiðnaði. Hann hafi verið rekstrarstjóri á Bakka undanfarin fimm ár.

Honum til fulltingis verður Andri Dan Traustason aðstoðarforstjóri. Andri mun gegna því hlutverki samhliða áframhaldandi störfum sem fjármálastjóri PCC á Bakka. Hann hefur starfað fyrir fyrirtækið frá árinu 2018.

Guðlaugur Þór Þórðarson, umhverfis-, orku- og loftslagsráðherra, skipaði Gest Pétursson forstjóra Umhverfis- og orkustofnunar í september. Sú stofnun er ný og tekur við starfsemi Orkustofnunar og hluta af starfsemi Umhverfisstofnunar frá og með næsta ári.

Gestur hefur verið forstjóri PCC á Bakka frá 2022. Áður starfaði hann meðal annars sem framkvæmdastjóri Veitna, forstjóri Elkem Ísland og framkvæmdastjóri öryggis-, heilbrigðis- og umhverfismála hjá Elkem Ísland.