Unglingaslagsmál á Sel­fossi á borði lög­reglu

Uppi varð fótur og fit í hópi íbúa á Selfossi í gær þar sem foreldrar voru hvattir til að ræða við börnin sín.

Þorsteinn Kristinsson aðalvarðstjóri hjá Lögreglunni á Suðurlandi segir rannsókn málsins á algeru frumstigi. Hann segir lögreglu nú afla gagna í málinu en það sem sé til skoðunar séu myndbandsupptökur af atvikinu sem og upptökur úr eftirlitsmyndavélum á svæðinu.

„Þetta er til rannsóknar hjá okkur og við erum að reyna að ná utan um þetta. Það er verið að leita í öllum myndavélum sem eru þarna og svo eru einhver myndskeið sem hafa verið tekin upp sem við erum að nota,“ segir Þorsteinn.

Eru þau í dreifingu?

„Ég veit það ekki nákvæmlega. Við erum með höndum myndband en ég veit ekki hvort, hvar eða hversu mikla dreifingu það hefur fengið.“

Alltaf alvarlegt

Þorsteinn segir lögreglu vita að um hóp manna var að ræða. Það sé unnið að því að komast að því hverjir þeir eru.

„Þolandinn er þekktur. Við höfum náð sambandi við hann. Þetta er hópur manna. Það er ljóst. En hver gerði hvað það er allt til rannsóknar,“ segir Þorsteinn.

Drengurinn leitaði á slysadeild eftir árásina.

„Það má segja að þetta hafi sloppið til en þetta er alltaf alvarlegt,“ segir hann um áverka drengsins.

Huldu andlit sín

Að neðan má sjá færslu móður sem lýsti því sem hún varð vitni að. Hún hefði tilkynnt málið til lögreglu.

„Fyrr í kvöld voru ljót slags­mál við/​und­ir Ölfusár­brú, Tryggvaskála­meg­in. Ef þú átt strák ca 15-18 ára með áverka eft­ir kvöldið væri ráð að spjalla við hann og reyna að fá frek­ari upp­lýs­ing­ar. Þetta voru 4-5 strák­ar á móti ein­um. Nokkr­ir áhorf­end­ur til hliðar. Greini­lega skipu­lagt því gerend­ur og áhorf­end­ur földu and­lit sín með grím­um og hett­um. Þetta voru grimm slags­mál en leyst­ust upp þegar vitni reyndu að stoppa þá. Lög­regl­an var kölluð til og komu rétt eft­ir að þeir hlupu í burtu. Veit ekki hvort þeir náðu í skottið á ein­hverj­um þeirra.“

Ráðist á dreng á leið í sund

Þá vakti kona í Breiðholti athygli á því að hafa orðið vitni að líkamsárás fyrir utan Breiðholtslaug á öðrum tímanum í gær. Lýsti hún því að hópur ungra krakka, líklega fimm, ráðist að unglingsdreng á leið í sund. Þolandinn og vinir hans hefðu verið af asískum uppruna.

„Hann var vankaður eftir þung og mikil högg og í áfalli og afþakkaði alla aðstoð bæði frá mér og starfsfólki laugarinnar.

Ég hef áhyggjur af því að hann hafi hlotið heilahristing og meiri skaða af þessu en hann þorði að viðurkenna, elsku drengurinn og því er mikilvægt að hann komist undir læknishendur.“

Hvatt er til þess í þessari umræðu sem fleirum að foreldrar taki höndum saman og reyni að takast á við ofbeldi ungmenna.

„Ræðum við börnin, stoppum þetta rugl!“

Fréttin hefur verið uppfærð.