„Það er heil­mikil kæling af þessu“

Leifur Bjarki Björnsson slökkvistjóri Rangárvallasýslu segir vinnuna við hraunkælingu hafa gengið vel. 

„Við komum hérna um hálf þrjú í nótt og í raun og veru hefur þetta bara gengið eins og við héldum og engin sérstök vandræði.“

En hefur þetta tilraunaverkefni um daginn þá borgað sig?

„Okkur finnst það já. Okkur finnst þetta vera að gera gagn. Það var flogið yfir þetta með hitamyndavél og þetta er heilmikil kæling af þessu,“ segir Leifur. 

Aðspurður segist hann ekki þora að fullyrða hvað hefði gerst ef ekki væri fyrir kælinguna. 

„Við byrjum að dæla í nótt og það virðist hafa náð að slökkva í gígnum,“ segir Leifur. Hann segir fagnaðarerindi fyrir þeirra vinnu að hraunrennsli fer minnkandi. 

„Það skiptir öllu máli að bæta ekki endalaust í. Þá er auðveldara að ráða við restina. Það er klárt mál.“

Hvernig er hugurinn í mannskapnum, er þreyta eftir nóttina?

„Nei, furðu lítil,“ segir Leifur. „Þetta er bara verkefni, og við höfum svo sem ekki borið hitann og þungann af því, okkar slökkvilið, en erum hérna til að aðstoða grindvíska slökkviliðið. Þannig að við kvörtum ekkert yfir því að þurfa að vaka eina nótt.“

Unnu í neyðarviðbragði í gær

Hörn Hrafnsdóttir verkfræðingur hjá Verkís fór einnig yfir stöðuna með fréttamanni á vinnusvæðinu. 

„Í gær vorum við að fá smá opnur í hraunið, sem fóru að lauma sér yfir garðinn sem við höfum kallað L1. Og við vorum svolítið að vinna í neyðarviðbragði í gær og að hindra að hraun færi mjög langt. Tókum svo mjög lágan garð aðeins frá til þess að varna því að ef þetta færi að verða meira, að þetta færi ekki mjög langt, væri bara innan þess svæðis,“ segir Hörn.

Í gærkvöldi hafi það gerst að undan hrauninu hafi opnast litlar lænur, sem varð til þess að þrýstingurinn virtist detta niður, auk þess sem kæling á opnunum austast var í gangi. 

„Og svo var verið að reyna halda þessum eystri í skefjum, þannig að núna erum við aftur farin að fókusa á það að hækka garðinn sjálfan, sem hraunið er að fara yfir. Og er búinn að vera í gangi í nokkurn tíma. Við erum alltaf að fá tafir á það út af þessum litlu hraunspýjum sem eru að lauma sér yfir garðinn. Þannig að nú erum við að vonast eftir því að við fáum fókusinn aftur á hækkunina á garðinum sjálfum,“ segir Hörn. 

Fólk vonandi á leið í sumarfrí

Þá virðist vera að hægjast á gosinu sjálfu, og Hörn segist vonast til að þá sé hægt að einblína á að hækka garðinn sjálfan.

Taka starfsmenn því ekki bara fagnandi?

„Ég held þetta séu bara bestu fréttir sem við höfum heyrt lengi. Fólk eygir kannski að það gæti komist í sumarfrí.“

Hörn segir þá allt kapp lagt á að hækka varnargarðinn í stað þess að reisa nýjan. „Svo er náttúrlega nýja hraunið búið að hækka svolítið upp fyrir [garðana], þannig að ef við fáum annað eldgos eftir einhverjar vikur, þá er í raun hraunið sjálft orðin aukavörn.“

Hún segir að í framhaldinu verði gerðir hraunhermar til að sjá hvort sú hækkun varnargarðanna sem áætluð er núna sé næg fyrir næstu vikur. 

„Þannig að við erum að reyna að ná þessu markmiði núna, og svo tekur greining á stöðunni við og við sjáum bara hvert þetta leiðir okkur.“