Dregur lík­lega til tíðinda í vikunni

Síðdegis á laugardaginn benti allt til þess að það væri að fara að gjósa enn eina ferðina á Reykjanesi þegar kvika hljóp úr kvikuhólfinu undir Svartsengi. Búist hafði verið við eldgosi dagana áður þar sem magn kviku var orðið sambærilegt því sem var fyrir fyrri eldgos á svæðinu. Kvikuhlaupið stöðvaðist hins vegar frekar hratt og ekki gaus. Ljóst er að kvikuhlaupið um helgina var lítið og er land strax tekið að rísa á ný.

„Módelið bendir til þess að einn komma fimm milljónir rúmmetra hafi farið úr Svartsengi núna og inn í kvikuganginn. Það þýðir að það nær að komast aftur í sömu stöðu á þremur dögum. Kannski á morgun þá erum við komin í svona besta gildi,“ segir Benedikt Ófeigsson jarðeðlisfræðingur hjá Veðurstofu Íslands.

Hann telur líklegt að það dragi aftur til tíðinda í vikunni og það verði annað kvikuhlaup eða eldgos.

„Það að þetta hafi ekki náð sér á strik núna er kannski vísbending um að kerfið sé eitthvað að breyta sér og að kvika eigi erfiðara með því að troða sér inn í ganginn. Þannig mögulega þýðir þetta að það fer eitthvað að breytast hegðunin. Við svona gerðum ráð fyrir því að það geti komið annað innskot núna í vikunni.“

Erfitt sé að segja til um hvernig næstu vikur og mánuðir koma til með að þróast.

„Þessi atburðarás er bara að þróast og þetta er bara hluti af þeirri þróun. Við sjáum ekkert fyrir hvernig þetta þróast og þetta er bara hluti af þeirri þróun. Við getum fylgst með því hvað er í gangi og varað við svona með stuttum fyrirvara þegar við sjáum eitthvað fara af stað en hvernig stóra þróunin er svona í framtíðinni bara höfum við engin mælitæki til þess að segja til um.“

Hættumati á svæðinu var breytt í gær.

„Bara niður á sama stig og það var á laugardaginn áður en þetta byrjaði og meðan ekkert meira gerist þá er nú ekki líklegt að við breytum því mikið.“

Hálf milljón rúmmetra af kviku safnast á sólarhring

Í nýrri frétt á vef Veðurstofunnar kemur fram að líkanreikningar sýni að það magn kviku sem hljóp á laugardaginn úr Svartsengi yfir í Sundhnúksgígaröðinni hafi verið um 1.3 milljónir rúmmetra.

„Áður var búið að reikna út að um hálf milljón rúmmetra af kviku safnist fyrir undir Svartsengi á sólarhring. Að öllu óbreyttu verður heildarmagn kviku undir Svartsengi orðið um 9 milljónir rúmmetra í lok dags á morgun, þriðjudag.“

Í fyrri atburðum hefur kvika hlaupið þegar heildarmagn kviku sem safnast hefur undir Svartsengi er á bilinu 8 til 13 milljónir rúmmetra. Því eru auknar líkur á nýju kvikuhlaupi og eldgosi þegar því magni hefur verið náð.

„Það má hins vegar benda á að eftir endurtekin gos í Fagradalsfjalli þá voru dæmi um að kvika læddist upp á yfirborðið án mikillar skjálftavirkni. Reikna þarf með að það gæti orðið þróunin með virknina á Sundhnúksgígaröðinni,“ segir á vef Veðurstofunnar.