Ætlar að verða for­seti og lærir af reynslu­miklum fram­bjóðanda

Netverji nokkur vakti athygli á því á samfélagsmiðlinum X að Ástþór hefði verið að safna undirskriftum í Tækniskólanum. Meiri athygli netverjans vakti þó vera Haffa í skólanum.

Í samtali við Vísi segir Haffi einfalda ástæðu vera fyrir þessu. Kveikjan hafi verið þegar Haffi hitti Ástþór fyrir tilviljun í hugleiðslu síðastliðinn sunnudag.

„Það var svo skemmtilegt, því ég hef líka viljað bjóða mig fram einhvern tímann í framtíðinni. Þannig að hann bauð mér þá að koma og læra aðeins hvað þetta snýst um. Mér fannst þetta bara áhugavert, og ég er sú manneskja sem vill taka tækifærin. Þannig að ég ákvað að fara og sjá hvað þetta snýst um,“ segir Haffi.

Þeir hafi farið í Sjómannaskólann, Tækniskólann og Listaháskólann í dag. Gaman hafi verið að hitta fólk og sjá hvernig forsetaframbjóðendur ræði við fólk og afli sér stuðnings. 

„Ef þú ætlar að bjóða þig fram, þá skaltu læra aðeins hvernig þetta fer fram.“

Útilokar ekki frekari aðstoð

Haffi segir alveg óljóst hvort hann komi til með að liðsinna Ástþóri frekar. Hann útiloki það ekki.

„Mér finnst bara gaman að geta hjálpað fólki aðeins og fá smá reynslu af þessu. Ef það eru aðrir sem vilja hjálp frá mér þá er ég til í það líka. Mér finnst mikilvægt að við séum ekki öll með sömu skoðun. Fólk er að safna undirskriftum til þess að geta boðið sig fram,“ segir Haffi og vísar til þess að hann hafi ekkert ákveðið um hver fái hans atkvæði í forsetakosningunum 1. júní næstkomandi. 

Haffa lítist vel á friðarboðskap Ástþórs og hafi heyrt um hann góða hluti. 

„Ísland á að vera staðurinn þar sem fólk getur komið, eins og Reagan og Gorbachev, og talað um hlutina.“

Ástþór er einn fimm sem tilkynnt hafa um forsetaframboð. Hin fjögur eru Arnar Þór Jónsson lögmaður, Axel Pétur Axelsson, Sigríður Hrund Pétursdóttir fjárfestir og Tómas Logi Hallgrímsson björgunarsveitarmaður. Óhætt er að segja að af þeim frambjóðendum sem fram eru komnir hafi Ástþór mesta reynslu af framboðsstörfum, en þetta er í sjötta sinn sem Ástþór sækist eftir lyklunum að Bessastöðum.

Þá hefur Jón Gnarr, skemmtikraftur og fyrrverandi borgarstjóri, sagst íhuga af alvöru að bjóða sig fram. 

Ekki pólitískt embætti

Þó Haffi sé ákveðinn í að bjóða sig fram síðar þá telur hann sig ekki tilbúinn. 

„Ég er að reyna að sýna fólki hver ég er sem manneskja, ekki bara sem listamaður, þess vegna er ég í sjálfboðastarfi, hjálpræðisherinn, hertex, kirkjan og hjálpa vinum sem voru að koma úr meðferð.“

Haffi segist ekki telja forsetaembættið eiga að snúast um pólitík.

„Þetta snýst um það hver hentar best í starfið til að vera fulltrúi okkar allra.“

Kannski 2028, kannski síðar

Aðspurður segir Haffi ekki ljóst hvort framboð hans til forseta verði 2028 eða síðar. 

„Maður veit ekki, því það gæti verið að það komi einhver, gæti verið Ástþór eða einhver annar. Það gæti komið eitthvað óvænt. 2028, ég veit ekki hvort það er nægur tími. Ég er bara að verða fertugur í september. Auðvitað þyrstir mig í að gera eitthvað flott fyrir landið mitt. Ég lít á þetta sem tækifæri. Ég hef þetta pláss og þennan tíma til að læra og fara svo að gera þetta vel,“ segir Haffi.

Að hans mati þurfi forsetinn að vera maður fólksins, og embættið eigi ekki að litast af pólitík eða skoðun þess sem á Bessastöðum situr.

„Mig vantar aðeins meiri tíma, aðeins meiri þróun. Ég þarf að vera sjálfsgagnrýnni, læra meira, fá gagnrýni frá öðrum. Hver veit, kannski verð ég faðir eftir nokkur ár og sé hlutina öðruvísi þá.“

Þrátt fyrir að tímaramminn sé óljós segir Haffi alveg klárt að einn daginn verði hann á kjörseðlinum.

„Þegar ég er kominn inn á fimmtugs- eða sextugsaldurinn þá má alveg búast við því að ég bjóði mig fram.“