Innlent

Kalla eftir jarð­göngum: Flestir í­búar hafa fests í snjó­flóði eða rétt sloppið

Lillý Valgerður Pétursdóttir skrifar
Bragi Þór Thoroddsen sveitarstjóri Súðavíkurhrepps segir fjölda snjóflóða hafa fallið á veginn undir Súðavíkurhlíð í gegnum árin og vill sjá jarðgöng sem fyrst.
Bragi Þór Thoroddsen sveitarstjóri Súðavíkurhrepps segir fjölda snjóflóða hafa fallið á veginn undir Súðavíkurhlíð í gegnum árin og vill sjá jarðgöng sem fyrst. Aðsend

Súðavíkurhlíð var lokað fyrirvaralaust í gær eftir að snjóflóð féll á veginn. Sveitarstjóri segir bíla hafa verið báðu megin við flóðið og kallar eftir jarðgöngum til að auka öryggi íbúa.

Snjóflóðið féll á níunda tímanum í gærkvöldi. Bragi Þór Thoroddsen sveitarstjóri Súðavíkurhrepps segir mildi að flóðið hafi ekki farið á bíla sem voru á veginum þegar snjóflóðið féll.

„Það voru allavega tveir bílar þarna sitt hvoru megin við flóðið. Maður veit ekki hversu margir aðrir hafa verið á hlíðinni.“

Hann segir nokkra hafa orðið veðurteppta í bænum vegna þessa.

„Þetta er hundrað og áttatíu manna þorp hérna. Hundrað og níutíu manns kannski. Við voru með þrjátíu og fimm manns í nótt. Hér er ekki gistiheimili eða hótel. Það þarf að koma þessu fólki fyrir. Við erum orðin allt of vön því. Við kunnum þetta. Þetta er ekki eitthvað hlutverk sem við ættum að standa í. Hér starfar ekki Rauði krossinn. Við erum bara fólkið hérna í þorpinu sem gerir þetta.“

Þannig veiti íbúar bæjarins strandaglópum jafnan frítt fæði á og húsnæði þegar svona kemur upp. 

„Þar fyrir utan þá þýðir þetta það að við förum ekki á Ísafjörð eða annað. Þetta varðar miklu meira en bara okkur.“

Hætta fylgir því oft fyrir íbúa að aka veginn undir Súðavíkurhlíð.Aðsend

Bragi segir alltof algengt að veginum um Súðavíkurhlíð sé lokað vegna aðstæðna. Til að mynda hafi veginum fyrstu þrjá mánuði ársins 2020 verið lokað fyrir umferð í fjörutíu daga. Íbúar hafi flestir fundið fyrir því hversu erfið hlíðin geti verið og þeirri hættu sem fylgir því að keyra hana. Þá búi þeir við hættu á grjóthruni þegar enginn snjór er. 

„Flestir sem hafa búið hér í einhvern tíma hafa annað hvort fests í flóði eða rétt sloppið.“

Bragi segir íbúa Súðavíkur lengi hafa kallað eftir jarðgöngum á milli Álftafjarðar og Skutulsfjarðar. Mikilvægt sé að hafist sé handa við göngin sem fyrst til að auka öryggi.

„Það er búið að tala um Álftafjarðargöng hérna í einhverja þrjá áratugi líklega eða lengur, fjóra sennilega. Þetta er búið að vera inn og út af samgönguáætlun. Þetta er inni á samgönguáætlun núna, inni á jarðgangnaáætlun, en ég held að þetta sé tímasett einhver staðar í framtíðinni. Sennilega eftir minn dag.“

Veginum var lokað þegar snjóflóðið féll í gærkvöldi en hann var opnaður á ný þegar búið var að moka.Aðsend
Snjóflóðin í Súðavík Súðavíkurhreppur Vegagerð Jarðgöng á Íslandi Færð á vegum Umferðaröryggi

Tengdar fréttir

Vegurinn milli Súðavíkur og Ísafjarðar opinn á ný

Vegurinn á milli Ísafjarðar og Súðavíkur á Vestfjörðum hefur verið opnaður fyrir umferð á nýjan leik. Veginum var lokað í gærkvöldi eftir að snjóflóð féll úr hlíðinni og yfir veginn. 

Súðavíkurhlíð lokuð vegna snjóflóðs

Uppfært 14:25: Búið er að opna veginn um Súðavíkurhlíð tímabundið á nýjan leik eftir að veginum var lokað fyrr í dag vefna lítils snjóflóðs. Á vef lögreglunnar á Vestfjörðum segir að veginum verði lokað í síðasta lagi klukkan 18 í kvöld og ekki opnaður fyrr en búið verður að meta aðstæður með tilliti til snjóflóðahættu í fyrramálið. Þó er hætta á að vegurinn gæti lokast fyrr.

Rúmur ára­tugur í Súða­víkur­göng sam­kvæmt á­ætlunum

Innviðaráðherra segir verið að skoða að stofna opinbert félag um jarðgangagerð að færeyskri fyrirmynd. Þannig yrði hægt í samvinnu við aðra að grafa göng á fleiri stöðum í einu með innheimtu veggjalds. Forgangsverkefnin í vegakerfinu séu mörg og brýn.

Vestfirðingar geti alls ekki beðið lengur

Guðmundur Ingi Kristinsson, þingflokksformaður Flokks fólksins, ítrekaði á Alþingi í dag kröfur sveitastjórnarfólks á Vestfjörðum um að ráðist yrði sem fyrst í gerð jarðganga milli Súðavíkur og Ísafjarðar. Hann vísaði til tíðra snjóflóða á svæðinu, sem sáust síðast um nýliðna helgi.

Súðavíkurgöng verða í næstu samgönguáætlun

Innviðaráðherra segir stefnt að þvi að jarðgöng milli Súðavíkur og Ísafjarðar verði í næstu samgönguáætlun stjórnvalda. Úrbótum í vegakerfinu hafi verið raðað eftir áhættusvæðum og þau svæði væru mörg á Íslandi.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið