Krefjast þess að Thomas komi ekki að máli Trumps

Hópur þingmanna sendi Thomas nýverið bréf þar, samkvæmt frétt Washington Post, sem þeir kölluðu eftir því að hann segði sig vanhæfan til að fjalla um málefni Trumps. Er það vegna þess að Virgina Thomas, eiginkona dómarans, sendi embættismönnum í Hvíta húsinu og þingmönnum Repúblikanaflokksins ítrekað skilaboð og hvatti þá til að snúa úrslitum forsetakosninganna.

Hún tók einnig þátt í fundi Trumps í Washington DC sem leiddi til árásarinnar á þinghúsið þann 6. janúar 2021, þar sem stuðningsmenn forsetans ruddust inn í þinghúsið til að koma í veg fyrir formlega staðfestingu úrslita kosninganna.

Þá sagði Virgina Thomas þingmönnum sem rannsökuðu árásina á þinghúsið í fyrra að hún væri enn sannfærð um að kosningunum hefði verið stolið af Trump með umfangsmiklu kosningasvindli.

Í bréfinu segja þingmennirnir að þetta veki upp spurningar um það hvort Thomas geti virst óhlutdrægur í málinu. Þeir segja að ef Thomas vilji sýna bandarísku þjóðinni að nýjar siðareglur hæstaréttar séu meira virði en virði pappírsins sem þær eru skrifaðar á, verði hann að segja sig frá málinu.

Sjá einnig: Hæsti­réttur Banda­ríkjanna setur sér siða­reglur í fyrsta sinn

Umræddar siðareglur eru að miklu leyti til komnar vegna uppljóstrana um að Clarence Thomas hefur í gegnum árin tekið við gjöfum frá bandarískum auðjöfrum.

Vill að Hæstiréttur taki málið í flýtimeðferð

Jack Smith, sérstakur rannsakandi dómsmálaráðuneytisins, leitaði nýverið til Hæstaréttar Bandaríkjanna og bað dómara um að taka fljótt til skoðunar hvort Trump nyti enn þeirrar friðhelgi frá lögsóknum sem fylgir forsetaembættinu.

Trump stendur frammi fyrir fjórum ákærum vegna tilrauna hans til að snúa úrslitum forsetakosninganna og lögmenn hans héldu því nýverið fram að hann nyti enn friðhelgi sem fyrrverandi forseti. Tanya S. Chutkan, einn af dómurunum sem eru yfir málunum gegn Trump, úrskurðaði gegn forsetanum fyrrverandi og sagði að það hafa setið í embætti forseta veitti manni ekki lífslangt leyfi til að brjóta af sér.

Hún sagði fyrrverandi forseta ekki njóta friðhelgi gegn rannsóknum, ákærum eða lögsóknum og að hægt væri að refsa þeim fyrir möguleg brot sem þeir frömdu í fangelsi.

Lögmenn Trumps áfrýjuðu því en Trump hefur lagt mikið kapp á að reyna að draga hælana og tefja málareksturinn gegn sér, þar til eftir forsetakosningarnar í nóvember á næsta ári.

Jack Smith, sem heldur utan um tvær ákærur gegn Trump, krafðist þess í síðustu viku að málið færi ekki hefðbundna áfrýjunarleið í gegnum dómskerfið heldur tæki Hæstiréttur Bandaríkjanna málið fyrir sem fyrst. Það var mánudaginn 11. desember en síðar þann sama dag gáfu Hæstaréttardómarar lögmönnum Trumps frest til 20. desember til að bregðast við kröfum Smith og sögðust dómararnir ætla að svara Smith eins fljótt og auðið væri um hvort málið yrði tekið þá leið sem hann vill.

Í kröfunni skrifuðu Smith og saksóknarar hans að það væri gífurlega mikilvægt að svara spurningunni um friðhelgi Trumps eins fljótt og hægt væri, svo hægt væri að hefja réttarhöldin gegn honum, verði kröfu hans um friðhelgi hafnað. Þeir sögðu málið ekki geta beðið til næsta dómatímabils Hæstaréttar.

Hæstiréttur kemur næst saman þann 5. janúar, samkvæmt dagskrá. AP fréttaveitan segir mögulegt að það verði fyrr en það sé óljóst.

Þetta yrði í fyrsta sinn sem Hæstiréttur Bandaríkjanna úrskurðar um það hvort fyrrverandi forsetar njóti sömu friðhelgi og starfsreglur dómsmálaráðuneytis Bandaríkjanna segja að sitjandi forsetar njóti gegn ákærum.

Sex af níu hæstaréttardómurum Bandaríkjanna voru skipaðir af forsetum úr Repúblikanaflokknum og þrír þeirra voru skipaðir í embætti af Trump. Thomas er ekki einn þeirra en hann var skipaður af George Bush árið 1991.