Innlent

Tók konu kverka­taki og dró hana burt

Jón Þór Stefánsson skrifar
Dómurinn féll í Héraðsdómi Reykjavíkur.
Dómurinn féll í Héraðsdómi Reykjavíkur. Vísir/Vilhelm

Karlmaður hlaut í vikunni sextíu daga fangelsisdóm, skilorðsbundin til tveggja ára, í Héraðsdómi Reykjavíkur vegna líkamsárásar gegn konu.

Atvikið sem málið varðar átti sér stað í húsnæði í Reykjavík árið 2021.

Maðurinn var ákærður fyrir að slá konuna í andlitið með flötum lófa, tekið hana kverkataki og haldið henni í gólfinu með því að þrengja að höndum hennar, og haldið fyrir vit hennar. Honum er síðan gefið að sök að hafa tekið um ökkla konunnar og dregið hana út úr húsinu.

Í ákærunni segir jafnframt að maðurinn hafi dregið konuna á hárinu niður stigagang hússins, en ákæruvaldið féll frá lýsingunni um að hann hafi „dregið hana á hárinu“.

Fyrir vikið hlaut kona nokkurra áverka í andliti og víðar um líkamann.

Játaði sök

Í dómi málsins kemur fram að maðurinn hafi skýlaust játað sök. Dómnum þótti með játningu hans og samkvæmt öðrum gögnum málsins að brot hans væru sönnuð.

Við ákvörðun refsingar var litið til þess að brotin hafi beinst gegn heilsu og velferð konunnar og að þau hafi valdið henni líkamstjóni.

Hins vegar lagði maðurinn fram staðfestingu á því að hann hafi leitað sér aðstoðar vegna hegðunar sinnar. Jafnframt þyrfti að líta til þess að langt sé liðið síðan maðurinn framdi brotið.

Líkt og áður segir hlaut maðurinn sextíu daga skilorðsbundna refsingu. Einnig er honum gert að greiða lögmanns- og sakarkostnað málsins, sem hljóðar upp á rúmlega 225 þúsund krónur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×