Heim­sókn á Lamb­eyrar: „Lög­reglan neitaði að koma“

Töluvert hefur verið fjallað um fjölskylduerjurnar á Lambeyrum eftir að þrjár frænkur Ásmundar Einars Daðasonar, barnamálaráðherra, sögðu sögu sína í hlaðvarpinu: Lömbin þagna ekki.

Deiluna má rekja til ársins 2007 þegar Einar Valdimar Ólafsson fellur frá og arfleiðir börnin sín átta jafnt að jörðinni Lambeyrum.

Ása Skúladóttir, frænka Ásmundar og stjórnandi hlaðvarpsins segir að föðursystir sín hafi ein verið prókúruhafi á þeim reikningum sem tilheyrðu jörðinni. Hún segir að Ásmundur hafi breytt prókúru og eignum búsins og föðurarfi systkinanna átta verið sólundað í braski. 

„Það sem gerist er að Ásmundur fer að sýsla með fé sem öll systkinin eiga saman, án þeirra leyfis og án þess einu sinni að láta þau vita. Hann gerir fjármálagjörninga sem eru þannig að hann tapar stórum hluta af peningunum.“

Ása segir að meðal annars hafi Daði notað peningana til að byggja hús handa Ásmundi á lóðinni.

Kaupa jörðina á nauðaungarsölu

Ása segir að Daði, faðir Ásmundar, hafi tekið hvert lánið á fætur öðru með veði í jörð sem ekki var öll í hans eigu, án samþykkis allra systkina sinna með þeim afleiðingum að fjölskyldan missir jörðina sem fer á uppboð árið 2017. Faðir Ásu og tvær systur hans, ásamt mági Ásu, kaupa þá jörðina á nauðungarsölu.

Ása segir að frá þeim tíma hafi pabbi hennar þurft að þola ítrekuð skemmdarverk, áreiti og ógnanir frá Daða og bróður hans, Valdimars, sem greinilega hafi ekki verið sáttir við gang mála.

Margir kílómetrar af girðingum hafi verið eyðilagðir, rotnandi kindahræ skilin eftir, skít dreift við íbúðarhús og tuttugu hektarar af túnum verið skornir og eyðilagðir. 

Ása segist halda að mörg skemmdarverkanna séu gerð í þeim tilgangi að ekki sé hægt að nota húsið að nýju Lambeyrum, húsið sem byggt hafi verið fyrir Ásmund. Pabbi Ásu hafi fyrir nokkrum árum leigt húsið til stéttarfélags en neyðst til að taka það af leigu þar sem ekki hafi verið hægt að bjóða fólki upp á að dvelja þarna fyrir áreiti.

Í sjónvarpsfréttinni hér að neðan sýnir Ása fréttamanni aðstæður á Lambeyrum:

„Hér hefur verið farið með plóg og allt túnið rifið upp. Nútíma heyvinnuvélar eru þannig að það er ekkert hægt að vinna þetta tún. Túnið er gjörsamlega ónothæft.“

„Hér sjáum við hvernig klippt hefur verið á girðingar. Systir mín tók þetta saman með loftmynd, þetta eru um fimm kílómetrar af girðingu sem hafa verið klippt niður. Í fyrsta lagi er ótrúleg vinna að girða þetta aftur en svo er það bara tilgangslaust því um leið og það er gert er þetta aftur klippt.“

„Hérna eru leifar af skítahrúgu. Hann var með dráttarvél og stóra skóflu og hendir skít beint við húsið, sem næst húsinu til að trufla hugsanlega leigjendur og svo er þetta bara áreiti.“

„Hér sérðu hjólförin eftir það þegar Daði tók sig til á bílum og dráttarvélum og fór hring eftir hring í kringum húsið til að reyna að áreita að ógna.“

Ása segir að aksturinn hafi náðst á öryggismyndavélar hússins og sendar á lögreglu sem hafi ekki brugðist við. Sjálf vilji hún ekki birta þær af ótta við kæru frá Daða.

„Við komum ekki“

Alvarlegast hafi verið þegar vatnsveitan hafi verið tekin í sundur með þeim afleiðingum að allt rennandi vatn fór af húsinu.

„Og þá er hringt á lögregluna sem neitar að koma. Það er hringt aftur og lögreglan segir þá með skýrum hætti að hún muni alls ekki koma nema það verði líkamsmeiðingar. Þannig þetta var ekki spurning um það að lögreglan væri svakalega upptekin, þetta var ekki spurning um að lögreglan væri upptekin í augnablikinu en kæmi seinna. Þessi átök stóðu yfir í marga klukkutíma og lögreglan sagði: Við komum ekki.“

Vildu ekki segja sína hlið málsins

Fréttamaður hitti Daða og bróður hans Valdimar og bauð þeim að segja sína hlið málsins. Þeir vildu ekki tjá sig um málið.

Engir eftirmálar af meintu innbroti

Ása segir Ásmund hafa í tvígang brotist inn í hús á jörðinni. Annars vegar í hús hjá gamla bænum þar sem faðir Ásu hafi staðið hann að verki og í hitt skiptið hafi hann brotist inn í húsið að nýju Lambeyrum, sjónarvottur hringt á lögreglu sem hafi mætt á svæðið og staðið hann að verki.

„En svo þegar pabbi var að reyna að kæra þá sagði lögreglan að það væri engin ástæða til að fara með þetta lengra, það verður ekki farið með þetta lengra þannig í raun urðu engir eftirmálar af þessu.“

Ásmundur hefur hafnað viðtölum um málið en sagði deiluna ekki koma sér við í yfirlýsingu á dögunum. Í upphafi hafi hann tekið einarða afstöðu með föður sínum en nú hafi hann stigið út úr átökunum.

Ása segir fjölskylduna ítrekað hafa leitað til lögreglu sem bæði neiti að mæta á svæðið og aðhafast í málinu. Aðspurð hvað geti skýrt segir Ása það spila inn í að um sé að ræða föður ráðherra sem hafi mikil ítök á svæðinu sökum stöðu sinnar.

„Það að hann sé ráðherra hefur bein áhrif á þetta mál. Það er engin spurning. Veitir föður hans og föðurbróður ákveðinn trúverðugleika og virðingu, bara af því að hann er ráðherra.“

Eina leiðin sem hún sá færa

Hún segir að það hafi verið þungt skref að segja sögu þeirra í hlaðvarpinu en að það hafi verið örþrifaráð þar sem áreitið hafi farið stigmagnandi á sama tíma og lögreglan geri ekki neitt.

„Eina leiðin sem ég sá færa og systir mínar sáum færa er bara út með þetta allt saman, út með sannleikann. Það er það sem við viljum með hlaðvarpinu. Vonandi verður það til þess að skemmdaverkin hætti.“