Ósáttur sjómaður sturtaði þorskhausum við dyr Alþingis

Við þorskhausana var sett upp skilti sem á stóð, meðal annars, að með því að stöðva umhverfisvænustu fiskveiðar landsins væru sjö hundruð manns að missa vinnuna. Þar stóð einnig að handfæraveiðar væru mun umhverfisvænni en veiðar með botntrolli og spurt hvort stjórnvöldum standi á sama um loftlagsmál, umhverfismál og komandi kynslóðir.

Bundnir við bryggju 330 daga árs

Guðlaugur Jónasson, smábátasjómaðurinn sem framkvæmdi gjörninginn, með þorskhausana segir í samtali við fréttastofu að hann hafi viljað vekja athygli á því sem hafi staðið á skiltinu. Hann segir togara mun verri fyrir umhverfið og vísar meðal annars til þess að kolefnisspor þeirra séu mun meiri en útblástur þeirra, þar sem troll losi mikið af koltvísýringi úr setlögum á hafsbotni.

Guardian fjallaði meðal annarra um rannsókn sem birt var í Nature árið 2021 en í niðurstöðum hennar kom fram að togarar losi álíka mikið af koltvísýringi og allar flugvélar heimsins.

Guðlaugur hefur stundað sjómennsku rúm fjörutíu ár. Hann segist sjálfur hafa komist á sjó 29 daga á strandveiðinni í sumar.

„Það er enginn rekstrargrundvöllur fyrir svona smábáta, á þeim brauðmolum sem hent er í okkur,“ segir hann.

„Við erum að stunda umhverfisvænustu veiðar á Íslandi og við erum bundnir við bryggjur 330 daga á ári.“

Hann segir einnig að á meðan strandveiðir standi yfir sé líf í öllum höfnum landsins, þar sem lífið sé víðar en ekki lítið á veturna, og að ferðamenn hafi mikinn áhuga á veiðunum.

Guðmundur Páll Jónsson, lögreglufulltrúi á höfuðborgarsvæðinu, segir að rætt hafi verið við Guðlaug á staðnum. Hann hafi ekki verið handtekinn en eigi væntanlega yfir höfði sér kæru og sekt. Vaktmaður á Alþingi hafi séð um að henda fisknum.

Stysta vertíðin hingað til

Sjómenn og Landssamband smábátaeigenda höfðu kallað eftir því að Svandís Svavarsdóttir, matvælaráðherra, endurskoðaði þá ákvörðun sína að auka ekki veiðiheimildir til strandveiða en það gerði hún ekki og var veiðin stöðvuð í gær.

Sjá einnig: Síðasti dagur strandveiða

Landssambandið vísaði meðal annars í áskorun til ráðherra til þess að strandveiðar brúi það tímabil sem þegar stóru fyrirtækin loki vegna sumarleyfa fram að næsta fiskveiðiári. Strandveiðar séu mikilvægar sjómönnum, fiskkaupendum og vinnsluaðilum.

Sjómenn hafa lagt stund á strandveiðar á rúmlega sjö hundruð bátum í sumar.

Strandveiðunum hefur iðulega lokið í ágúst en í ár var strandveiðikvótinn alls 8.527 tonn. Óánægjan er sérstaklega mikil meðal smábátaeigenda á norðan- og austanverðu landinu, en þar er aðalveiðitímabilið síðari hluta sumars, í júlí og ágúst.

Forsvarsmenn Strandveiðifélags Íslands eru að undirbúa mótmæli sem til stendur að halda í miðbæ Reykjavíkur á laugardaginn. Kjartan Páll Sveinsson, formaður félagsins, sagði í samtali við Ríkisútvarpið í gær að mótmæla ætti ótímabærri stöðvun strandveiða annað árið í röð og kalla eftir því að strandveiðikerfið verði lagað.