Fullyrðir að Zion Willamson verði kominn í nýtt lið á fimmtudaginn

Simmons gat ekki gefið upp heimildarmann sinn fyrir þessari fullyrðingu en sagði: „Ónefndur aðili, sem ég treysti, sagði mér í gær að hann yrði ekki í liðinu lengur á fimmtudaginn.“ Fer þessi fullyrðing saman við fréttir sem berast úr herbúðum Pelicans, sem virðast hafa fengið nóg af hegðun Williamson utan vallar.

Einkalíf Williamson hefur verið töluvert í fréttum undanfarið en Moriah Mills, fyrrum klámstjarna, fór mikinn á Twitter á dögunum þar sem hún sagðist eiga í ástarsambandi við Zion. Það væri kannski ekki stórmál ef ekki væri fyrir þá staðreynd að daginn áður tilkynntu Zion og og kærasta hans, Akheema, að þau ættu von á barni. 

Til að bæta gráu ofan á svart hefur svo önnur kona stigið fram á Twitter og sagst eiga í ástarsambandi við Zion, og birti m.a. myndir af Zion sofandi máli sínu til stuðnings.

Vandræði utan og innan vallar

En Zion er ekki bara í vandræðum utan vallar. Hann þótti einn efnilegasti leikmaður nýliðavalsins 2019 og notuðu Pelicans 1. valrétt til að velja hann. Honum hefur þó gengið afar illa að halda sér heilum heilsu en Zion lék aðeins 24 leiki sitt fyrsta tímabil í deildinni og 61 það næsta, en alls er tímabilið 82 leikir.

Tímabilið 2021-22 lék Zion ekkert vegna meiðsla og aðeins 29 leiki á nýliðnu tímabili. Hann hefur einnig legið undir ámæli fyrir að vera of þungur og sýna engan metnað til að koma sér í form fyrir það álag sem fylgir því að spila í NBA. Zion er í dag skráður 129 kg á vefsíðu NBA, en hann er tæpir tveir metrar á hæð.

Það er þó engum blöðum um það að fletta að Zion er hæfileikaríkur leikmaður og þegar hann er á vellinum halda honum engin bönd, en hann hefur skorað að meðaltali tæp 26 stig í leik á ferlinum. Í leik gegn Timberwolves í desember skoraði Zion það mesta sem hann hefur skorað í einum leik á ferlinum, eða 43 stig.

Félagaskiptahasar í kringum nýliðavalið

Búast má við allskonar félagaskiptafléttum í kringum nýliðavalið í NBA sem fram fer á fimmtudaginn, en lið geta skipt valrétti sínum til annarra liða, og fá eða láta þá gjarnan leikmenn með í slíkum pökkum. Pelicans eiga 14. valrétt, en þá er oft orðið fátt um fína drætti í valinu.

Talið er líklegt að Pelicans hafi augastað á einhverjum af fimm efstu valréttunum. Engar líkur eru á að Spurs láti fyrsta valrétt af hendi en 99,9% líkur eru á að Gregg Popovich og félagar velji franska undrabarnið Victor Wembanyama.

Þá eru eftir í röð: 2. Charlotte Hornets, 3. Portland Trail Blazers, 4. Houston Rockets og 5. Detroit Pistons. Ein flétta gæti verið á þá leið að þriðja liðið komi inn og Zion endi þar meðan að valréttir liðanna ganga kaupum og sölum. New York Knicks hafa m.a. verið nefndir, sem og 76ers en enn sem komið er þá er ekkert fast í hendi.