Rahm segir kylfinga svikna en Koepka nýtur ringul­reiðarinnar

Í síðustu viku var tilkynnt um samruna PGA- og LIV-mótaraðanna í golfi. Þjóðarsjóður Sádi-Arabíu (PIF) setti á laggirnar sína eigin golfmótaröð til höfuðs hinni fornfrægu PGA-mótaröð frá Bandaríkjunum á síðasta ári.

Síðan þá hefur mikill titringur verið innan golfheimsins og forráðamenn PGA hótað kylfingum sem ganga til liðs við LIV öllu illu. Helsta ástæðan fyrir því að menn færðu sig yfir var sú að það er einfaldlega miklu betur borgað að keppa á LIV-mótaröðinni.

Nú hafa þessar tvær mótaraðir sameinast ásamt Evrópumótaröðinni, DP World Tour. Eins og gefur að skilja eru margir kylfingar hissa, aðrir reiðir og svo öðrum sem er í raun alveg sama. Matt Fitzpatrick stendur til að mynda á gati.

Jon Rahm, næstbesti kylfingur heims um þessar mundir, er einn þeirra sem líður eins og forráðamenn PGA hafi svikið kylfinga mótaraðarinnar. Hann hafnaði tilboði frá LIV upp á 200 milljónir Bandaríkjadala [Rúmlega 27 og hálfan milljarð íslenskra króna].

„Ég hélt það myndi kvikna í símanum mínum á einum tímapunkti,“ sagði Rahm í viðtali sem birt var á vef BBC, um þann fjölda skilaboða sem honum barst eftir að fréttirnar bárust.

„Við erum þar að við erum eitt stórt spurningarmerki og höfum ekki fengið svörin sem við viljum. Maður vill hafa trú á þeim sem stjórna og ég vil trúa því að þetta sé það besta fyrir okkur alla en það er greinilega ekki samstaða um það. Almenna tilfinningin er sú að fjölda fólks líður eins og þau hafi verið svikin.“

Rahm tók fram að hann væri enginn viðskiptasérfræðingur en þeir sem stjórnuðu væru það og því myndu þeir taka betri ákvörðun en hann. Hann sagði þó að endingu að enn væri of mörgum spurningum ósvarað.

„Ég vissi í raun ekki hvað var í gangi og veit það ekki enn,“ sagði Scottie Scheffler, besti kylfingur heims um þessar mundir, en hvorki hann né Rahm höfðu hugmynd um að PGA-mótaröðin væri að íhuga samruna við LIV.

Brooks Koepka, einn af þeim sem stökk á gylliboð LIV á sínum tíma, sagði að kylfingar LIV-mótaraðarinnar hefði ekki heldur haft hugmynd að mótaraðirnar væru að íhuga sameiningu.

„Við vissum ekki neitt. Ég held þetta hafi komið öllum á óvart,“ sagði Koepka en hann virðist njóta ringulreiðarinnar. Hann hefur átt góðu gengi að fagna undanfarið og segist aldrei spila betur en þegar hlutirnir eru í algjörri ringulreið.

„Það verður allt hægara og ég get einbeitt mér betur. Ég þarf að einbeita mér á meðan allir aðrir eru að díla við ringulreiðina og hugsa um aðra hluti,“ sagði Koepka að lokum.