Stefán tók erfiða ákvörðun í janúar en er spenntur fyrir næsta vetri

Stefán og Díana Guðjónsdóttir munu saman stýra ungu og spennandi liði Hauka sem undir stjórn Díönu komst í undanúrslit Olís-deildarinnar í vor og tapaði þar í æsispennandi oddaleik gegn ÍBV.

Stefán er sigursælasti handboltaþjálfari efstu deildar kvenna á þessari öld og hefur meðal annars unnið sjö Íslandsmeistaratitla og fimm bikarmeistaratitla, með Fram og Val. Hann hætti að eigin ósk hjá Fram í vor eftir níu tímabil með liðinu og segir það hafa verið erfiða ákvörðun.

„Já, mjög svo. Ég er búinn að vera þarna í níu ár, að vísu tvö Covid-ár, og búinn að kynnast leikmönnum vel. Þetta eru frábærir leikmenn og frábærar manneskjur, svo það var mjög erfitt að kveðja. En öllu góðu lýkur einhvern tímann. Ég ákvað í janúar að segja að þetta væri gott, og ég er sáttur við þá ákvörðun,“ segir Stefán í samtali við nafna sinn, Stefán Árna Pálsson, í Sportpakkanum.

„Gaman að sjá hvort hún taki næsta skref“

Stefán samdi eins og fyrr segir til þriggja ára við Hauka.

„Þetta er spennandi lið og flottur klúbbur. Þeir eru búnir að standa mjög faglega að þessu og ég hlakka bara til að vera þarna næsta vetur,“ segir Stefán sem er spurður sérstaklega út í Elínu Klöru Þorkelsdóttur, besta og efnilegasta leikmann síðustu leiktíðar í Olís-deildinni.

„Það eru náttúrulega sex leikmenn þarna í U19-landsliðinu. Svo eru eldri og reyndari leikmenn þarna líka. Hún [Elín Klara] er búin að standa sig frábærlega og það verður gaman að sjá hvort hún taki næsta skref, á næsta ári,“ segir Stefán. En ætlar hann að breyta einhverju í Haukaliðinu?

„Það er alltaf eitthvað en ég vil ekki tjá mig um það núna. Ég er ekki einu sinni búinn að hitta leikmennina.“