Geðlæknir ávísaði sjúklingi oxýkódóni og morfíni í kílóa vís

Í úrskurði ráðuneytisins kemur fram að í apríl í fyrra hafi embætti landlæknis borist tilkynning frá apóteki um tilteknar lyfjaávísanir læknisins. Embættið hóf rannsókn á ávísunum læknisins á lyfjum og fóru starfsmenn embættisins á starfstöð hans þann 12. apríl.

Degi síðar mætti læknirinn til fundar hjá landlækni og var um leið til bráðabirgða sviptur rétti til að ávísa tilteknum lyfjum. Ákvörðunin var svo rökstudd í bréfi um viku síðar. Í júlí var hann svo alfarið sviptur leyfinu eftir tilkynningu mánuði fyrr um fyrirhugaða sviptingu.

Sviptingin náði til ávísunar lyfja í tilgreindum ATC flokkum lyfja enda hefði læknirinn ávísað óhæfilega á tiltekinn sjúkling og þar með brotið alvarlega gegn starfsskyldum sínum sem læknir.

Læknirinn kærði ákvörðun landlæknis til heilbrigðisráðuneytisins sem tók kæruna til skoðunar.

Lyfjatengd andlát eru algengust á Íslandi af öllum Norðurlöndunum. Þúsundir Íslendinga nota hið alræmda verkjalyf oxýkódóni, marfalt fleiri en fyrir áratug. Í Kompás í fyrra var hröð þróun hins nýja ópíóðafaraldurs skoðuð og hrikalegar afleiðingar sem neyslan hefur á líf fólks.

Sjúklingar hefðu orðið vitni að uppákomunni

Læknirinn bar fyrir sig að hafa ávísað nokkru magni lyfja til sjúklings sem hefði verið í meðferð hjá sér. Einn tiltekinn stór skammtur hefði verið vegna ferðar viðkomandi til útlanda.

Sjúklingurinn hefði ekki náð árangri í meðferð á Vogi og því hefði sjúklingurinn verið hjá honum í skaðaminnkandi meðferð. Þá væri óforsvaranlegt að mætt hefði verið fyrirvaralaust á starfstöð hans sem geðlæknir enda hafi sjúklingar hans orðið vitni að uppákomunni.

Hann hefði ekki fengið nægan andmælarétt, lögmaður hans hefði verið erlendis þegar málið kom upp og þá hefði álitsgjafi á meðferð sjúklingsins verið vanhæf enda komið að málum hans á Vogi.

„Gríðarlegt og óskiljanlegt“ magn

Embætti landlæknis benti á að orðalag geðlæknisins um „nokkurt magn“ lyfja í ávísun fyrir ferðina til útlanda í apríl í fyrra væri óeðlilegt. Um hefði verið að ræða 40 grömm af morfíni og 70 grömm af oxýkódóni. Embættið taldi magnið vera gríðarlegt og óskiljanlegt.

Samkvæmt útreikningum embættisins hefði læknirinn ávísað um 2,1 kíló af virka efninu oxýkódóni og 1,5 kíló af virka efninu morfíni. Þá séu ekki talin með önnur ávana- og fíknilyf sem læknirinn hefði ávísað sjúklingnum. Þá ætti sjúklingurinn sér sögu um ofskömmtun og hefði verið lagður inn á bráðamóttöku vegna þessa.

Það magn sem ávísað hefði verið í apríl í fyrra hefði getað reynst sjúklingnum lífshættulegt vegna dauða í ofskammti. Læknirinn hafi í raun séð sjúklingnum fyrir fíknilyfjum með sífellt hækkandi skömmum.

Brotið gegn réttindum sjúklings

Sérfræðingur í fíknilækningum og lyflækningum tjáði landlækni að meðferðin sem læknirinn hefði veitt væri sláandi, ófagleg og óviðeigandi. Meðferðin og þróun hennar væri ekki eðlileg eða í samræmi við viðurkenndar aðferðir.

Heilbrigðisráðuneytið segir í úrskurði sínum að sýnt hafi verið fram á að ávísanir læknisins hafi verið óhæfilegar, bæði hvað varðar magn í heild sem og daglega skammtastærð. Sú hafi verið margföld á við daglega notkun einstaklinga í háskammta neyslu.

Með ávísunum hafi læknirinn brotið gegn réttindi sjúklinga um að fá þjónustu miðað við ástand og horfur á hverjum tíma. Skilyrði hafi verið fyrir hendi til að svipta lækninn rétti til að ávísa sjúklingnum ópíóðalyfjum.

Þá taldi ráðuneytið að ekki hefði verið nóg að áminna lækninn í þessu tilfelli. Meðferð málsins hefði ekki farið í bága við meðalhófsreglu og aðgerðin ekki of víðtæk. Embætti landlæknis hafi verið heimilt að svipta lækninn réttinum án undangenginnar áminningar.

Var sviptingin því staðfest.