Myllan mögulega mætt í mæjónesið

Máni Snær Þorláksson skrifar 22. mars 2023 15:12

Höfuðstöðvar Myllunnar-Ora í Korputorgi. Gangi kaupin eftir gæti Gunnars ehf. merkið bæst við þarna á skiltið. Egill Aðalsteinsson

Myllan-Ora ehf. hefur undirritað samning um kaup á Gunnars ehf. en samningurinn er gerður með fyrirvara um samþykki Samkeppniseftirlitsins. Kaupin eru gerð í kjölfar þess að kaup Kaupfélags Skagfirðinga á Gunnars ehf. voru gerð ógild í janúar á þessu ári.

Greint er frá kaupunum í tilkynningu frá Myllunni. Þar er haft eftir Hermanni Stefánssyni, forstjóra Myllunnar-Ora, að áhugaverð tækifæri felist í kaupunum þar sem vörumerkið Grunnars er rótgróið. Þá styrki það vöruframboð Myllunar-Ora.

„Innlend matvælaframleiðsla á undir högg að sækja í krefjandi umhverfi og kaupin á Gunnars eru til þess fallin að styrkja undirliggjandi rekstur og þannig grundvöll innlendrar matvælaframleiðslu,“ segir í tilkynningunni.

Þá kemur fram að aðilar samningsins munu ekki tjá sig um kaupin á meðan þau eru til meðferðar hjá Samkeppniseftirlitinu.

Sem fyrr segir voru kaup Kaupfélags Skagfirðinga á Gunnars ehf. gerð ógild fyrr á þessu ári. Í ákvörðun Samkeppniseftirlitsins kom fram að samruni fyrirtækjanna myndi leiða til alvarlegrar röskunar á samkeppni í framleiðslu og sölu á mæjónesi og köldum sósum.

Kaup og sala fyrirtækja Samkeppnismál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.