Vill að Grænlendingar flytji fiskinn út í gegnum Ísland

Þetta kemur fram í viðtali forstjórans við fréttamiðillinn Sermitsiaq. Þar segir að á fundi ráðamanna Royal Arctic Line með grænlenskum útflytjendum í síðustu viku hafi menn orðið sammála um að kanna hvernig Ísland geti stuðlað að því að bæta möguleika Grænlendinga til að koma afurðum sínum beint á markað í framtíðinni. Til fundarins var boðað vegna óánægju útflytjenda með mikla verðhækkun skipafélagsins á fraktflutningum.

Í fréttinni er vísað til þess að þingmaðurinn Mariane Paviasen hafi nýlega lagt fram fyrirspurn til landsstjórnar Grænlands um hve mikið Danir og dönsk fyrirtæki högnuðust á því að fiskur, sem veiddur væri við Grænland, væri fluttur til Danmerkur og þaðan til umheimsins.

Landsstjórnin gat ekki svarað fyrirspurninni, þar sem afla þyrfti upplýsinga frá einkafyrirtækjum, en gat þó fullyrt að 80 til 90 prósent af útflutningi Grænlendinga færi sannarlega til Danmerkur og að meirihlutinn væri þaðan fluttur til annarra landa.

Forstjóri Royal Arctic Line segir Grænlendinga sjálfa geta flutt fiskinn beint út í gegnum Ísland. Það muni meðal annars spara meðhöndlun afurðanna í frystihúsum í Danmörku.

„Verðmætatapið sem felst í því að meðhöndla vöruna tvisvar, það hlýtur að vera sparnaður í því að senda vöruna beint út frá Grænlandi,“ segir Verner Hammeken.

Spurningar sem þurfi að svara lúti meðal annars að opinberu eftirliti. Sumar vörur þurfi að fara í gegnum Danmörku áður en þær geti farið lengra út í heiminn vegna þátta eins útflutningsleyfa og vottana dýralækna. Einnig geti verið kröfur varðandi tolla.

Skipafélagið og útflytjendur hyggjast vinna rösklega að skoðun málsins og stefna að því að vera búin að setja eitthvað niður á blað fyrir 1. apríl næstkomandi.

Í beinni fréttaútsendingu Stöðvar 2 frá Nuuk í ársbyrjun 2017 var rætt við forstjóra Royal Arctic Line:

Fyrir sex árum tilkynntu Royal Arctic Line og Eimskip um samstarfssamning um smíði þriggja skipa, þeirra stærstu í flutningasögu beggja landa, ásamt samningi um samnýtingu skipanna, sem sagt var frá hér:

Hér má sjá þegar samsiglingarnar hófust með komu nýsmíðaðs skips Grænlendinga til Íslands sumarið 2020: