Innlent

Andstæðingar kvikmynduðu komu hvalkjötsins til Japans

Kristján Már Unnarsson skrifar
Norska frystiskipið Silver Copenhagen við komuna til Japans í gær. Skipið lagðist að  bryggju í Shimonoseki, útborg Kokura.
Norska frystiskipið Silver Copenhagen við komuna til Japans í gær. Skipið lagðist að bryggju í Shimonoseki, útborg Kokura. Life Investigation Agency/Whale and Dolphin Conservation

Hvalverndarsamtök sem fylgjast með löndun íslenska hvalkjötsins í Japan segja nær enga eftirspurn eftir kjötinu þar í landi og fullyrða að óseldar birgðir hafi endað sem hundafóður. Á sömu slóðum fagnaði íslenskt kvikmyndatökulið sjötugsafmæli söngvarans Egils Ólafssonar í dag.

Í fréttum Stöðvar 2 var sýnt frá því þegar norska frystiskipið Silver Copenhagen kom til Kokura í Japan í gær eftir sjö vikna siglingu frá Íslandi.

Hvalkjötinu skipað í land.Life Investigation Agency/Whale and Dolphin Conservation

Fulltrúar hvalverndarsamtakanna Whale and Dolphin Conservation og systursamtaka þeirra í Japan, Life Investigation Agency, fylgdust með skipinu leggjast að bryggju og tóku myndir af því þegar farminum var skipað í land.

Samkvæmt útflutningstölum Hagstofu Íslands voru þetta tæp 2.600 tonn að verðmæti um 2,8 milljarðar króna. Þetta er fyrsta hvalkjötið sem flutt er frá Íslandi í fjögur ár og jafnframt mesta magn hvalaafurða sem flutt hefur verið út í 35 ár.

„Product of Iceland“ stendur á umbúðunum.Life Investigation Agency/Whale and Dolphin Conservation

Hvalverndarsamtökin sendu jafnframt frá sér yfirlýsingu þar sem þau fullyrða að nánast engin eftirspurn sé eftir hvalkjöti í Japan og óseldar birgðir hafi farið í hundamat. Segja þau japanska hvalveiðiiðnaðinn reyna að auka eftirspurnina með því að þrýsta kjötinu í skólamötuneyti og selja það ódýrt í matarsjálfsölum.

Af heimasíðu samtakanna Whale and Dolphin Conservation. Þau segja að núna sé hægt að kaupa hvalkjöt í matarsjálfsölum í JapanWhale and Dolphin Conservation

Þess má geta að borgin Kokura, á milli Nagasaki og Hiroshima, tengdist einnig kjarnorkuárásum Bandaríkjahers í lok síðari heimsstyrjaldar. Kokura var nefnilega aðalskotmarkið í seinni árásinni en slæmt skyggni varð til þess að áhöfn B-29 sprengjuflugvélarinnar valdi varaskotmarkið Nagasaki á síðustu stundu.

Siglingaferill flutningaskipsins með hvalkjötið. Borgirnar þrjár komu allar við sögu í kjarnorkuárásunum á Japan þann 6. og 9. ágúst 1945.Grafík/Sara Rut Fannarsdóttir

Áður hafði áhöfn könnunarflugvélar sem fór á undan sagt skyggnið nægilega gott yfir Kokura. Starfsmenn stáliðjuvers í borginni, sem óttuðust að hún yrði næst í röðinni á eftir Hiroshima, brenndu hins vegar kolatjöru til að hylja borgina með svörtum reyk. Fyrir vikið sá áhöfn sprengjuflugvélarinnar ekki skotmarkið, sneri frá og sleppti sprengjunni í staðinn yfir Nagasaki.

Kokura, sem núna heitir raunar Kitakyushu eftir sameiningu sveitarfélaga, var jafnframt varaskotmark fyrir Hiroshima. Í Japan tala menn því um lán Kokura, að hafa tvívegis sloppið undan kjarnorkuárás.

Frá afmælisveislu Egils Ólafssonar í Hiroshima í dag.BALTASAR BREKI

Svo vill til að íslenskt kvikmyndatökulið með leikstjórann Baltasar Kormák í fararbroddi er einnig statt á sömu slóðum við tökur á myndinni Snertingu, með Egil Ólafsson í aðalhlutverki, og var sjötugum Agli fagnað með óvæntri afmælisveislu í Hiroshima í dag.

Hér má sjá frétt Stöðvar 2:

Hér má nánar fræðast um flutning hvalkjötsins frá Íslandi til Japans:


Tengdar fréttir

Hvalverndarsamtök fylgjast með siglingu þessa skips

Alþjóðlegu hvalverndarsamtökin Whale and Dolphin Conservation fylgjast núna af áhuga með siglingu norska skipsins Silver Copenhagen yfir Indlandshaf. Þau telja nokkuð víst að farmur þess sé íslenskt hvalkjöt á leið til Japans.

Sjötugur Egill klökknaði í óvæntri afmælisveislu í Japan: „Lífið hefur verið mér gjöfult!“

„Afmælisdaginn bar upp á frídegi og ég ætlaði bara að hafa það náðugt,“ segir tónlistarmaðurinn, leikarinn og listamaðurinn Egill Ólafsson sem fyllir sjö tugi í dag þ. 9. febrúar. Þessum merku tímamótum fagnar hann í Japan þar sem hann er nú staddur í tökum fyrir kvikmynd Baltasars Kormáks, Snertingu, en Egill fer þar með aðalhlutverkið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×