Segir heimslistann í golfi úreltan

Stjórn Opinbera heimslistans í golfi (OWGR) hefur ekki viljað taka mót á LIV-mótaröðinni inn í sína útreikninga á heimslistanum. Það bitnar á Smith og fleirum af bestu kylfingum heims sem tóku í fyrra tilboði frá hinni sádi-arabísku LIV-mótaröð. LIV-mótaröðin hefur valdið klofningi í golfheiminum og kylfingar á henni mega ekki keppa á PGA-mótaröðinni.

Smith er farinn úr öðru sæti heimslistans niður í það fjórða og Dustin Johnson, sem síðast var á toppi heimslistans sumarið 2021, er kominn niður í 46. sæti þrátt fyrir sigur á LIV-mótaröðinni í fyrra.

„Auðvitað er þetta sárt,“ sagði hinn 29 ára gamli Smith. „Ég var mjög nálægt því að komast í efsta sætið og það var klárlega eitthvað sem ég vildi ná að afreka,“ sagði Smith sem telur heimslistann smám saman orðinn marklausan en allir viti þó hverjir séu bestu kylfingar heims.

„Þegar maður mætir á móti þá veit maður hverja maður þarf að vinna, burtséð frá einhverjum heimslista. Venjulega eru sjö til átta menn á vellinum sem maður veit að munu láta mann berjast fyrir þessu.

Eftir því sem þetta heldur áfram svona þá verður heimslistinn úreltari. En þurfum við þá? Það væri gaman en maður veit hverja maður þarf að vinna þegar maður mætir út á golfvöll,“ sagði Smith.

Allir kylfingar LIV-mótaraðarinnar eru orðnir hluti af Miðausturlanda- og Afríku-mótaröðinni, sem átti að gera þeim kleyft að fá stig á heimslista þar sem OWGR hefur viðurkennt þá mótaröð, en það hefur þó ekki gengið eftir.