Segir lands­menn eyða of miklu

Þetta sagði Guðrún í samtali við fréttamann í kvöldfréttatíma Stöðvar 2 í gærkvöldi, en verðbólgan var til umræðu á á þingi í gær.

Hinn forni fjandi þjóðarinnar

Guðrún sagði verðbólguna vera okkar forni fjandi. Öllum finnist mjög slæmt þegar hún fari af stað og það hafi allir áhyggjur af stöðunni. Það sé alveg ljóst.

„Hins vegar skulum við líka hafa það í huga að tekjustofnar ríkisins, þeir hafa rýrnað miðað við verðlag þannig að þeir hafa setið eftir. Þetta eru tekjustofnar sem standa undir rekstri ríkisins, útgjöldum ríkisins, sem að líka er kallað eftir auknu fé í, eins og í heilbrigðiskerfið, menntakerfið, samgöngukerfið og svo framvegis.“

Hægt er að hlusta á viðtalið við Guðrúnu og Þorgerði Katrínu í spilaranum að neðan. 

Fólk að eyða of miklu

Guðrún segir að heldur sé ekki hægt að líta framhjá því að við erum að koma út úr Covid-kreppu. Þar hafi Ísland, líklega eitt ríkja í heiminum, verið að hækka laun verulega á tímabilinu.

„Við erum sömuleiðis – eins sárt og það er að segja það – þá er fólk sömuleiðis að eyða of miklu. Það sjáum við á því að viðskiptajöfnuður okkar er neikvæður. Þannig að við erum að flytja meira inn heldur en út og þegar svoleiðis er þá tappast það af í gengi krónunnar eða í verðbólgu. Þannig að þetta er sameiginlegt verkefni okkar allra.“

Hún bendir einnig á að þegar efnahags- og viðskiptanefnd tók hækkanir á opinberum gjöldum fyrir á haustþinginu, þá hafi það verið metið sem svo í fjármálaráðuneytinu að hinar fyrirhuguðu hækkanir hefðu 0,2 prósent áhrif á verðbólguna.“

Verðbólga í boði ríkisstjórnarinnar

Þorgerður Katrín Gunnarsdóttir, formaður Viðreisnar, segir að allir helstu umsagnaraðilar – hvort sem það séu launþegahreyfingarnar, neytendasamtökin og Samtök atvinnulífsins – hafi varað eindregið við því að verðbólga myndi hækka vegna aðgerða ríkisstjórnarinnar.

„Þessi hækkun á verðbólgu er fyrst og síðast að ríkisstjórnin ákvað að láta heimilin bera hitann og þungann af þessu. Við erum að sjá núna verðbólgu hækka í fyrsta sinn í þrettán, fjórtán ár í janúar. Hvað er hægt að gera? Við bentum meðal annars á að hækkanir á gjöldum – hvort sem það er á bensín, bíla, búsið blessaða, eða ekki síst matvöruna – að þeim yrði haldið í skefjum. Það gerði ríkisstjórnin ekki. Hún hlustaði ekki á það.

Það er líka hægt að lækka eða afnema tolla. Hætta með þessa verðlagsnefnd búvera. Treysta svolítið á samkeppni, treysta á frelsið. Og um leið veita beingreiðslur til bænda. Það er margt hægt að gera til að lækka þetta gríðarlega háa verðlag á matarkörfunni. Matarkarfan er einn helsti útgjaldaliður íslenskra heimila.“

Blanda sem sést ekki í samanburðarlöndunum

Þorgerður segir að ríkisstjórnin hafi einfaldlega ákveðið það að láta íslensk heimili bera hitann og þungan af þessu. 

„Þessi mikla hækkun á verðbólgu er í boði ríkisstjórnarinnar, hennar er ábyrgðin.

Við erum að sjá svolítið að einhverju leyti gamla Ísland birtast okkur að nýju með miklum vöxtum og mikilli verðbólgu. Blanda sem sést hvergi í okkar samanburðarlöndum en hér er þessi blanda ekki síst í boði ríkisstjórnarinnar. Hún verður einfaldlega að axla ábyrgð og taka skref.

Ég varð undrandi að heyra það að forsætisráðherra var einfaldlega að segja hvað væri búið að gera og það sem hún ákvað var beinlínis til tjóns fyrir heimilin í landinu. Hún gat ekkert sagt okkur hvað þau ætluðu að gera til að lina þessar byrðar á heimilin í landinu og ég varð fyrir miklum vonbrigðum hvað það varðar,“ sagði Þorgerður Katrín.