Golf

Einn besti kylfingur heims dolfallinn yfir golfhæfileikum Bales

Ingvi Þór Sæmundsson skrifar
Meðan Gareth Bale spilaði enn fótbolta var hann stundum gagnrýndur fyrir að einbeita sér of mikið að golfinu.
Meðan Gareth Bale spilaði enn fótbolta var hann stundum gagnrýndur fyrir að einbeita sér of mikið að golfinu. getty/Matthew Horwood

Jon Rahm, sem er í 3. sæti heimslistans í golfi, var dolfallinn yfir golfhæfileikum Gareths Bale eftir að spila níu holur með Walesverjanum á dögunum.

Bale lagði fótboltaskóna á hilluna fyrr í þessum mánuði. Hann hefur þó ekki sagt skilið við íþróttirnar. Bale er nefnilega fyrirtaks kylfingur og ætlar að keppa á AT&T Pebble Beach Pro-Am mótinu í byrjun næsta mánaðar. Mótið er á vegum PGA-mótaraðarinnar.

Til að undirbúa sig fyrir mótið spilaði Bale níu holur með Rahm sem er einn fremsti kylfingur heims. Spánverjinn vann Opna bandaríska meistaramótið fyrir tveimur árum og hefur unnið tvö af síðustu þremur mótum á PGA-mótaröðinni.

Rahm fannst mikið til golfhæfileika Bales koma. „Ég sagði honum að þú gætir ekki verið svona góður í fótbolta og golfi á sama tíma. Það væri ekki sanngjarnt. Þú getur ekki einbeitt þér að einum hlut og samt verið svona góður í golfi. En hann elskar golf. Hann vill spila meira og vonandi hitti ég hann oftar á Pro-Am,“ sagði Rahm í samtali við Marca. Hann sagði að Bale hafi ekki beðið hann um nein ráð.

„Hann spurði ekki um neitt. Hann þarf þess ekki enda nógu góður,“ sagði Rahm.

Jon Rahm fagnaði sigri á The American Express mótinu um helgina.getty/Katelyn Mulcahy

Bale verður ekki eina stjarnan sem keppir á mótinu í næstu viku en meðal annarra heimsþekktra einstaklinga sem verða á því eru leikarinn Bill Murray og NFL-kappinn Aaron Rodgers. Á mótinu verða einnig þekktir atvinnukylfingar á borð við Matt Fitzpatrick og Patrick Cantlay.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.