Erlent

Talin hafa myrt ellefu og fjórtán ára börn sín og svo svipt sig lífi

Atli Ísleifsson skrifar
Það var vinur fjölskyldunnar sem tilkynnti málið til lögreglu.
Það var vinur fjölskyldunnar sem tilkynnti málið til lögreglu. Getty

Móðir og tvö börn hennar fundust látin á heimili sínu í bænum Vejrumbro, skammt frá Viborg í Jótlandi í Danmörku, í gær. Lögregla í Danmörku telur að konan hafi myrt börnin og svo svipt sig lífi.

Lögregla á Mið-Jótlandi greindi frá því í tilkynningu í gær að 49 ára kona og ellefu og fjórtán ára börn hennar hafi fundist látin í húsi í við Østervangsvej í Vejrumbro.

Það hafi verið vinur fjölskyldunnar sem hafi komið að þeim látnum og tilkynnt málið til lögreglunnar.

„Frumrannsókn okkar bendir til að konan hafi að öllum líkindum banað börnunum tveimur og svo svipt sig lífi,“ sagði lögreglumaðurinn Jim Hansen. Hann leggur þó áherslu á að málið sé enn til rannsóknar. Ekkert bendi þó til að aðrir hafi komið við sögu.

Vejrumbro er lítill bær með um fjögur hundruð íbúa, um tíu kílómetra austur af Viborg.

Lögregla hefur boðað til íbúafundar í kvöld vegna málsins, enda sé um að ræða mál sem hafi skekið samfélagið.

Fréttir bárust af því klukkan 17 að staðartíma í gær að búið væri að girða af hluta vegar í Verjumbro vegna rannsóknar máls. Var síðar greint frá því að þrjár manneskjur hafi fundist látnar í húsi í bænum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×