Ómar Ingi lætur pressuna ekki trufla sig

„Tilfinningin er góð og hér verður hörkustemning. Það er góður andi í liðinu og við erum búnir að æfa vel,“ segir Ómar Ingi pollrólegur að vanda.

Væntingar eru miklar til liðsins og strákarnir setja markið einnig hátt.

„Fyrst og fremst ætlum við að byrja á því að spila góðan handbolta. Við erum nánast á heimavelli hérna og það verður geðveikt. Það er mikil spenna og best að fara að byrja þetta.“

Ómar Ingi hefur verið einn besti handboltamaður heims, ef ekki sá besti, undanfarið ár. Hann hefur verið kjörinn íþróttamaður ársins tvö ár í röð og fólk treystir á hans framlag í Svíþjóð. Finnur hann fyrir pressunni?

„Já, já. Eins og venjulega samt. Ég er með eigin væntingar og pæli meira í því. Það er að spila vel í hverjum leik og sjá hvað það gefur okkur.“