Norðmenn furða sig á Tenerife-æði Íslendinga

Jakob Bjarnar skrifar 28. desember 2022 11:23

Einn þeirra sem hefur sótt Tenerife heim á undanförnum árum, með vinum sínum og samstarfsmönnum, er hinn geðþekki grínari Steindi Jr. Ef til vill hefur það haft sitt að segja hvað varðar vinsældir Tenerife? aðsend

Vísi hefur borist fyrirspurn frá norskum blaðamanni sem spyr hvort þetta fái staðist, að 2,4 prósent þjóðarinnar dvelji á Tenerife yfir jólin? Getur það verið?

Vísir hefur fjallað um heldur leiðinlegt veður sem hefur verið á Tenerife að undanförnu; þar hefur verið talsvert hvassviðri sem hefur dregið með sér sand frá Sahara yfir eyjuna. Fréttastofa ræddi við Svala Kaldalóns, ferðamálafrömuð sem búsettur er á Tenerife af því tilefni og kom fram í viðtali við hann að áætlað væri að þar dveldu nú yfir hátíðirnar milli 8 til 9 þúsund Íslendingar.

Vísi barst í kjölfarið fyrirspurn frá Leo Lunde, sem er ritstjóri norsks netmiðils sem gefinn er út á Kanaríeyjum, Canariavisen.

Leo Lunde segir að nokkrir Íslendingar séu meðal lesenda miðilsins og þeir hafi sett sig í samband við ritstjórnina vegna fréttar Vísis þar sem fram komi að milli átta til níu þúsund Íslendingar séu um þessar mundir á Tenerife. Hvort þetta gæti verið?!

„Tekur sú tala til ársins alls eða er tilfellið að þeir séu þarna allir í einu? Ef svo er þá þýðir þetta að um 2,4 prósent þjóðarinnar hafi farið til Tenerife í einu?“ spyr Leo Lunde forviða. Blaðamaður tjáði Leo að Íslendingar ættu það til að vera öfgafullir í því sem þeir taka sér fyrir hendur og það væri til málsháttur á íslensku: Þegar ein beljan mígur verður annarri mál.

Leo óskaði þá eftir símanúmeri á Svala Kaldalóns, hann vildi heyra nánar í honum því þetta væri sannarlega í frásögur færandi. Sennilega heimsfrétt.

Íslendingar erlendis Ferðalög Jól Áramót Spánn Noregur Fjölmiðlar Kanaríeyjar

Tengdar fréttir

Rigning og rok á Tene: „Við verðum bara inni“

Gul viðvörun er í gildi á Kanaríeyjum og rigning og rok hefur verið á Tenerife síðan í gær. Fjölmargir Íslendingar eyða jólunum á eyjaklasanum en láta veðrið ekki eyðileggja stemninguna.

26. desember 2022 11:59

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.