Fóru beinustu leið að skila og skipta gjöfum

Fékkstu raftæki sem þú áttir fyrir eða fékkstu jafnvel tvö eintök af sömu bókinni í jólagjöf? Er skyrtan númeri of lítil eða skórnir númeri of stórir? Ekki örvænta, ef þetta hentar ekki þá bara skilarðu eða skiptir, það er ekkert mál. Eða er það svo?

Fyrsti opnunardagur verslana eftir jól var í dag og má því gera ráð fyrir því að margir hafi nýtt tækifærið til að skila eða skipta jólagjöfum sem hentuðu ekki alveg. En hversu rúmur er skilafresturinn og er algengt að fólk skili jólagjöfum?

Lítið sem ekkert samræmi er á milli verslana hvað varðar lengd skilafrests á vörum en formaður Neytendasamtakanna, Breki Karlsson, sagði í samtali við fréttastofu að mikið sé um fyrirspurnir til samtakanna varðandi knappan skilafrest. 

Vafi leikur á um lögformlegar reglur um skilafrest. Til eru tillögur að verklagsreglum frá árinu 2000 sem Viðskiptaráðuneytið gaf út sem mæla með því að fresturinn sé ekki skemmri en tvær vikur. Fyrirtækjum er þó ekki skylt að fara eftir þeim.