Rýmingu í Mýr­dal af­létt

Í gær voru tvö hús að Höfðabrekku í Mýrdal rýmd vegna mögulegrar snjóflóðahættu. Húsin sem rýmd voru tilheyra bæði hóteli á svæðinu. Annað þeirra var gistirými og hitt þjónustuhús. Gestirnir sem þar dvöldu voru fluttir í annað húsnæði sem tilheyrir sama hóteli. 

Í tilkynningu frá lögreglunni segir að rýmingunni hefur verið aflétt. Þá er fólki bent á að gæta að sér á ferðum sínum undir bröttum hlíðum næstu daga því úrkoma á Suðurlandinu hefur verið það mikil að víða gæti verið hætta á að spýjur hlaupi fram, einkum í fjalllendi. 

Mikilvægt er fyrir þá sem ætla að ferðast um Suður- og Suðausturland að kynna sér upplýsingar um færð og veður og gæta þess að ökutæki sem farið er á séu búin til vetraraksturs.