Golf

Sú sigursælasta í sögunni látin: „Yfirgaf þennan heim eins og hún lifði lífi sínu“

Valur Páll Eiríksson skrifar
Whitworth vann ófáa titlana í gegnum tíðina.
Whitworth vann ófáa titlana í gegnum tíðina. David Cannon/Allsport/Getty Images

Fyrrum atvinnukylfingurinn Kathy Whitworth er látin 83 ára að aldri. Hún er sigursælasti atvinnukylfingur í sögu PGA-mótaraðarinnar.

Whitworth lést skyndilega er hún hélt upp á jólin með fjölskyldu sinni samkvæmt tilkynningu frá eiginkonu hennar.

„Kathy yfirgaf þennan heim eins og hún lifði lífi sínu; elskandi, hlægjandi og skapandi minningar,“ segir í tilkynningu Bettye Odle, konu Whitworth.

Whitworth er sigursælasti kylfingur í sögu PGA-mótaraðarinnar en hún fagnaði sigri á 88 mótum á ferlinum. Það eru sex fleiri sigrar en Mary Kathryn Wright, sem att kappi við Whitworth ósjaldan á ferli þeirra.

Einnig vann hún sex fleiri mót en þeir sigursælustu í karlaflokki, Tiger Woods og Sam Snead, með 82 sigra á mótaröðinni, líkt og Wright.

Whitworth vann sex risamót á ferli sínum en síðasti sigur hennar á móti var árið 1985, 23 árum eftir fyrsta sigur hennar.




Fleiri fréttir

Sjá meira


×