Þetta kemur fram í fréttatilkynningu frá félaginu. Algalíf ræktar örþörunga á Ásbrú í Reykjanesbæ og framleiðir úr þeim andoxunarefnið astaxanthín. Yfirstandandi stækkun á verksmiðju Algalífs er komin vel á veg. Heildarstærð verksmiðju Algalíf verður 12.500 fermetrar þegar verkinu lýkur seint á næsta ári, en stækkunin nemur 7500 fermetrum . Framleiðslugeta félagsins mun fjórfaldast frá því sem nú er. Fjárfesting vegna stækkunarinnar er um 4,5 milljarðar króna.
„Stækkunin hefur gengið í samræmi við áætlanir og fyrstu kerfin er þegar virk. Nýja verksmiðjan mun hjálpa Algalíf að styrkja sig í sessi sem eitt fremsta fyrirtæki í heimi í framleiðslu og markaðssetningu á náttúrulegu astaxanthíni. Til viðbótar mun bætt aðstaða gefa ný tækifæri til að leggja aukna áherslu á rannsóknir og þróun og sækja inn á nýja markaði,“ er haft eftir Orra Björnsyni, forstjóri Algalífs.
Slitnaði upp úr viðræðum
Fyrr í haust slitnaði upp úr viðræðum um sölu á öllu hlutafé Algalífs til hóps fjárfesta undir forystu Stoða og Alfa Framtaks. Heimildir Innherja herma að slitnað hafi upp úr þeim viðræðum, meðal annars vegna þess að sölutölur ársins 2022 voru ekki í samræmi við áætlanir. Því hafi kaupendahópurinn viljað endursemja um verðið til lækkunar. Þær viðræður báru ekki árangur.
Ef áætlanirnir hefðu gengið eftir hefðu Stoðir átt á milli 40 til 45 prósent í Algalífi. Aðrir íslenskir fjárfestar, meðal annars íslenskir lífeyrissjóðir, horfðu til þess að kaupa samanlagt um 55 til 60 prósenta hlut á móti Stoðum, en sá hópur var leiddur af nýjum framtakssjóði í rekstri Alfa Framtaks.
