Viðskipti erlent

Greiða leiðina að nýstárlegu kol­efnis­gjaldi á inn­flutning til Evrópu

Kjartan Kjartansson skrifar
Evrópusambandið ætlar að jafna leikinn á milli evrópskra framleiðenda sem þurfa að greiða fyrir losunarheimildir og samkeppnisaðila þeirra utan álfunnar þar sem grænum gjöldum er ekki til að dreifa.
Evrópusambandið ætlar að jafna leikinn á milli evrópskra framleiðenda sem þurfa að greiða fyrir losunarheimildir og samkeppnisaðila þeirra utan álfunnar þar sem grænum gjöldum er ekki til að dreifa. Vísir/EPA

Evrópsk innflutningsfyrirtæki þyrftu í raun að greiða kolefnisgjald af ákveðnum vörum sem þau flytja inn frá löndum sem hafa minni metnað í loftslagsmálum með nýrri löggjöf sem Evrópuþingið og leiðtogaráð Evrópusambandsins hafa náð samkomulagi um. Reglurnar yrðu þær fyrstu sinnar tegundar í heiminum.

Kolefnislandamærajöfnunarkerfi Evrópusambandsins (CBAM) er ætlað að jafna samkeppnisstöðu framleiðslufyrirtækja sem þurfa að greiða fyrir losun gróðurhúsalofttegunda innan evrópska viðskiptakerfisins með losunarheimildir (ETS) gagnvart innfluttum vörum. 

Innflutningsfyrirtækjum verður gert að greiða mismuninn á kolefnisgjaldi þar sem vara er framleidd og gjaldsins sem evrópskir framleiðendur þurfa að greiða innan ETS. Það gera þau með því að kaupa svokallaða CBAM-vottun.

Þannig geta aðeins aðeins þau lönd sem setja sér að minnsta kosti jafnmetnaðarfull losunarmarkmið og Evrópusambandið flutt inn vörur án þess að greiða þurfi fyrir CBAM-vottun fyrir þær. Lögunum er sagt ætlað að skapa hvata fyrir ríki utan Evrópusambandsins að auka metnað sinn í loftslagsmálum.

CBAM á að ná til innflutnings á járni, stáli, sement, áli, áburði og rafmagni en einnig vetnis, ákveðinnar óbeinnar losunar og sumra járn- og stálafurða eins og skrúfna og bolta, að því er segir í tilkynningu frá Evrópuþinginu.

Afnema ókeypis losunarheimildir á sama tíma

Lögin eiga að taka gildi í október á næsta ári en fyrst um sinn þurfa innflytjendur aðeins að skrá og tilkynna losun sem fylgir vörum. Innleiðing á CBAM hangir saman við umbætur Evrópusambandsins á losunarheimildakerfinu sjálfu. Regluverkið tekur ekki gildi að fullu fyrr en byrjað verður að afnema ókeypis losunarheimildir sem evrópskum framleiðendum hefur verið úthlutað.

Evrópuþingið og leiðtogaráðið eiga enn eftir að ná saman um breytingarnar á ETS-kerfinu en til stendur að semja um þær í vikunni. ETS-kerfinu er ætlað að skapa hvata fyrir stóriðju til þess að draga úr losun gróðurhúsalofttegunda sem valda loftslagsbreytingum með því að láta hana greiða fyrir losun sína. Verðinu á heimildunum er ætlað að hækka með tímanum.

CBAM er hluti af aðgerðapakka Evrópusambandsins í tengslum við markmið þess um að draga úr losun gróðurhúsalofttegunda um 55 prósent miðað við losun ársins 1990 fyrir árið 2030.


Tengdar fréttir

Náðu saman um loftslagslög fyrir Evrópu

Umhverfisráðherrar aðildarríkja Evrópusambandsins náðu samkomulagi um frumvörp að loftslagslögum eftir viðræður sem stóðu fram á nótt. Sölubann við jarðefnaeldsneytisknúnum bifreiðum árið 2035 lifði nóttina af en ráðherrarnir samþykktu einnig milljarðasjóð til að hjálpa fátækari íbúum álfunnar að takast á við aukinn kostnað við losun kolefnis.

Sam­þykktu að svipta stór­iðju fríum losunar­heimildum fyrir 2032

Evrópuþingið samþykkti stórtækar breytingar á viðskiptakerfi Evrópusambandsins með losunarheimildir í dag. Stóriðjufyrirtæki hætta að fá ókeypis losunarheimildir fyrir árið 2032 en í staðinn verður tekinn upp kolefnisskattur á innflutt stál, sement og fleiri vörur.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×