Allee lék á als oddi í Anubis

Snorri Rafn Hallsson skrifar
alle-2

Anubis kortið er nýkomið inn í atvinnuleikinn í CS:GO og voru lið Ármanns og Viðstöðu þau fyrstu til að keppa í því í Ljósleiðaradeildinni.

Lið Ármanns hafði betur í hnífalotunni. Fjórföld fella frá Hundza tryggði Ármanni réttinn á að velja sér hlið í fyrri hálfleik og kaus liðið að byrja í sókn. Í fyrstu tveimur lotunum tókst Viðstöðu að aftengja sprengjuna en Ármann komst fljótlega upp á lagið með að komast í gegnum vörnina og vinna sex lotur í röð. Lykillinn var að ná að fella leikmenn Viðstöðu snemma í lotunum og hreinsa síðan upp.

Upp úr miðjum hálfleik var lið Viðstöðu þó farið að læra betur á kortið og krækti í fimm af síðustu sjö lotunum. 

Staðan í hálfleik: Ármann 8 – 7 Viðstöðu

Í síðari hálfleik var komið að Ármanni að aftengja sprengjuna í skammbyssulotunni og Viðstöðu að leggja upp í langa runu. Mozar7 og Allee skiptu vappahlutverkinu bróðurlega á milli sín sem skilaði sér í fjölmörgum fellum og greiðri leið um kortið. Þannig komst lið Viðstöðu í stöðuna 12–9.

Ármann sneri þá vörn í sókn, jafnaði og komst aftur yfir með því að nýta sér hver einustu mistök sem lið viðstöðu gerði og var það Ofvirkur á vappanum sem lék stórt hlutverk í því.

Viðstöðumenn réttu þó úr kútnum undir lokin og innsiglaði Allee sigurinn í 30. lotu með þrefaldri fellu á vappanum.

Lokastaða: Ármann 14 – 16 Viðstöðu

Næstu leikir liðanna:

  • Viðstöðu – Dusty, þriðjudaginn 6/12, kl. 19:30
  • Ármann – Breiðablik, fimmtudaginn 8/12, kl. 20:30

Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.


Tengdar fréttir

Goa7er leiddi LAVA til sigurs

Lið Viðstöðu og LAVA mættust í Inferno kortinu í Ljósleiðaradeildinni í CS:GO í gærkvöldi.

Leikirnir




    Velkomin á Vísi. Þessi vefur notar vafrakökur. Sjá nánar.