Sara Rún skoraði 33 stig í leiknum og er nú sá körfuboltamaður, karl eða kona, sem hefur skorað flest stig í einum landsleik í Laugardalshöllinni í sögu landsliðanna beggja.
Sara tók metið af Jóni Arnóri Stefánssyni sem náði tvisvar sinnum að skora 32 stig í einum leik í Laugardalshöllinni. Jón Arnór skoraði fyrst 32 stig á móti Svartfjallalandi árið 2012 og endurtók leikinn á móti Búlgaríu ári síðar.
Sara er líka fyrsta konan sem nær að skora þrjátíu stig í landsleik í Höllinni en gamla stigamet kvenna í Laugardalshöllinni var í eigu Helenu Sverrisdóttur sem skoraði 29 stig í sigri á Ungverjalandi í febrúar 2016.
Þetta er aðeins í níunda skiptið sem landsliðskona nær að skora 30 stig í einum landsleik en Sara Rún hafði náð því einu sinni áður. Helena Sverrisdóttir (5) og Anna María Sveinsdóttir (2) hafa náð því oftast.
Stigamet Önnu Maríu er frá árinu 1996 þegar hún skoraði 35 stig í sigri á Möltu. Helena hefur tvisvar sinnum skorað 34 stig í einum landsleik og einu sinni 33 stig eins og Sara í gær. Allir þessir stigamiklu leikir þeirra Helenu og Önnu Maríu komu á útivelli.
Það eru aðeins fjórir körfuboltamenn sem hafa skorað þrjátíu stig eða meira í Laugardalshöllinni en auk Söru og Jóns Arnórs eru það Pálmar Sigurðsson og Teitur Örlygsson. Pálmar var sá fyrsti til að ná þrjátíu stiga leik í Höllinni en það var í apríl 1986.
- Flest stig fyrir íslensku körfuboltalandsliðin í Laugardalshöll:
- 33 stig - Sara Rún Hinriksdóttir á móti Rúmeníu í nóvember 2022
- 32 stig - Jón Arnór Stefánsson á móti Búlgaríu í ágúst 2013
- 32 stig - Jón Arnór Stefánsson á móti Svartfjallalandi í september 2012
- 31 stig - Pálmar Sigurðsson á móti Portúgal í apríl 1986
- 31 stig - Teitur Örlygsson á móti Lúxemborg í maí 1996
- 31 stig - Teitur Örlygsson á móti Írlandi í maí 1996
- 29 stig - Helena Sverrisdóttir á móti Ungverjalandi í febrúar 2016
- 29 stig - Logi Gunnarsson á móti Slóveníu í nóvember 2000
- 28 stig - Pétur Guðmundsson á móti Finnlandi í mars 19981
- 28 stig - Teitur Örlygsson á móti Noregi í maí 1996
