Handbolti

Kristján „brjálaður“ ef hann fengi ekki sæti á HM: „Ég er mjög bjartsýnn“

Sindri Sverrisson skrifar
Kristján Örn Kristjánsson gerir sér miklar vonir um að komast á HM í janúar.
Kristján Örn Kristjánsson gerir sér miklar vonir um að komast á HM í janúar. VÍSIR/HULDA MARGRÉT

Kristján Örn Kristjánsson er einn af hægri skyttunum sem berjast um sæti í landsliðshópi Guðmundar Guðmundssonar fyrir HM í handbolta í janúar. Hann segist hafa fengið góð skilaboð frá landsliðsþjálfaranum.

Kristján, eða Donni eins og hann er alltaf kallaður, tekur undir að samkeppnin sé mikil í landsliðinu en hann var í góðu spjalli í nýjasta hlaðvarpsþætti Seinni bylgjunnar sem hlusta má á hér að neðan. Þar ræddi hann einnig um komandi viðureign PAUC við Íslandsmeistara Vals í Evrópudeildinni.

Kristjáni var kippt inn í síðasta landsliðshóp vegna meiðsla Ómars Inga Magnússonar og hann býst við að komast í HM-hópinn:

„Ég er mjög bjartsýnn á það. Ég spjallaði við Gumma Gumm og hann sagði mér að ég væri í plönunum hjá honum. Allt gott og blessað með það. Svo er aðaldæmið að sanna sig.

Ég reyndi mitt besta til að sanna mig í þessum leikjum á móti Ísrael og Eistlandi, og fannst það ganga nokkuð vel. Ég stimplaði mig ágætlega inn sem gæi sem getur borið eitthvað fram fyrir landsliðið. En svo er það í höndunum á Gumma að velja, sem er alls ekki auðvelt starf myndi ég segja,“ sagði Kristján. 

En var það Kristján sem hafði frumkvæðið að fyrrgreindu spjalli þeirra Guðmundar?

„Nei, nei. Hann hringdi bara í mig þegar Ómar datt úr hópnum, fjórum dögum fyrir verkefnið [leikina við Eistland og Ísrael], og þá var ég bara inni. Hann sagði mér að ég væri í plönunum fyrir HM líka.“

En á skalanum 1-10 hversu brjálaður yrði Kristján ef hann kæmist ekki í HM-hópinn?

„Ég myndi segja ellefu bara.“

Hægt er að hlusta á hlaðvarpsþátt Seinni bylgjunnar í heild hér að neðan en þar er einnig rýnt í komandi leiki í 13. umferð Olís-deildar karla.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.