Neytendur

Fá pakka­ferðina til Madonna endur­greidda vegna Co­vid-19

Atli Ísleifsson skrifar
Fjölskyldan, sem telur þrettán manns, var á leið til Madonna di Campiglio á Norður-Ítalíu.
Fjölskyldan, sem telur þrettán manns, var á leið til Madonna di Campiglio á Norður-Ítalíu. Getty

Landsréttur hefur staðfest dóm Héraðsdóms Reykjaness að Ferðaskrifstofa Íslands skuli endurgreiða stórfjölskyldu pakkaferð til skíðabæjarins Madonna di Campiglio á Norður-Ítalíu sem fara átti í þegar kórónuveirufaraldurinn skall á af fullum þunga. Fjölskyldan, alls þrettán manns, átti að fara í ferðina 29. febrúar 2020 en afpantaði ferðina daginn áður, sama dag og fyrsta kórónuveirutilfellið var staðfest hér á landi og útbreiðslan var þegar orðin mikil á Ítalíu.

Ferðaskrifstofan, sem rekur meðal annars Úrval Útsýn, var dæmd til að endurgreiða samtals 2,6 milljónir króna, en um var að ræða þrjú dómsmál sem rekin voru samhliða. Ágreiningurinn sneri að því hvort að stórfjölskyldan ætti rétt á endurgreiðslu úr hendi ferðaskrifstofunnar vegna afpöntunar á pakkaferðinni sem þau höfðu þegar greitt fyrir að fullu.

Í dómunum þremur kemur fram að fólkið hafi átt pantaða ferð til Ítalíu vikuna 29. febrúar til 7. mars 2020 og fól hún í sér flug með Icelandair til og frá Verona, rútuferð fram og til baka milli Verona og Madonna di Campiglio og hótelgistingu á hótelinu Cristal Palace þar í bæ í sjö nætur. Laust fyrir miðnætti daginn fyrir fyrirhugaða brottför afpantaði einn í fjölskyldunni ferðina fyrir hönd stórfjölskyldunnar vegna útbreiðslu Covid-19 á Ítalíu.

Á þessum tíma höfðu íslensk yfirvöld skilgreint fjögur héröð á Norður-Ítalíu sem hááhættusvæði fáeinum dögum fyrir fyrirhugaða brottför, en Madonna var þó ekki eitt þeirra líkt og fram kom í málflutningi ferðaskrifstofunnar.

Höfnuðu beiðni um endurgreiðslu

Í dómunum er rekið að ferðaskrifstofan hafi hafnað endurgreiðslunni þann 2. mars þar sem vísað var í að samkvæmt skilmálum yrðu ferðir sem væri að fullu greiddar ekki endurgreiddar.

Þessu mótmælti fjölskyldan með bréfi rúmri viku síðar þar sem grein var gerð fyrir forsendum afpöntunarinnar. Var þar vísað í að samkvæmt lögum um pakkaferðir og samtengda ferðatilhögun geti ferðamaður afpantað ferð áður en hún hefjist gegn greiðslu sanngjarnrar þóknunar. Þá segir ennfremur að ferðaskrifstofa eigi ekki rétt á greiðslu þóknunar úr hendi ferðamanns hafi ferð verið afpöntuð vegna „óvenjulegra og óviðráðanlegra aðstæðna“. Slíkar aðstæður geti auk annars verið útbreiðsla farsótta eða sjúkdóma.

Ferðaskrifstofan hafnaði endurgreiðslunni endanlega með bréfi 13. mars 2020 þar sem meðal annars var vísað í að Madonna hafi ekki verið skilgreint sem hááhættusvæði af íslenskum sóttvarnayfirvöldum.

Fjölskyldan leitaði þá til kærunefndar vöru-og þjónustukaupa sem kvað upp sinn úrskurð haustið 2020, fjölskyldunni í vil. Ákvað fjölskyldan þá að höfða þrjú mál á hendur ferðaskrifstofunni eftir að ferðaskrifstofan hafði tjáð þeim að hún myndi ekki una úrskurði kærunefndarinnar.

Sannarlega óvenjulegar og óviðráðanlegar aðstæður

Mat Héraðsdóms Reykjaness var að þær óvenjulegu og óviðráðanlegu aðstæður sem uppi voru á Norður-Ítalíu þegar ferð fjölskyldunnar var afpöntuð, hafi verið þess eðlis að þær höfðu afgerandi áhrif á fyrirhugað ferðalag hennar. Þær hafi gert það að verkum að ekki var öruggt fyrir hana að ferðast þangað.

Að því virtu var það niðurstaða dómsins að stefnandi ætti rétt til fullrar endurgreiðslu umræddrar skíðaferðar úr hendi ferðaskrifstofunnar á grundvelli laga um pakkaferðir. Þá þótti það ekki hafa þýðingu þótt umrædd skíðaferð hafi verið afpöntuð með svo skömmum fyrirvara sem raun bar vitni, enda komi skýrt fram í lögunum að ferðamaður geti afpantað pakkaferð áður en ferðin hefst.

Landsréttur féllst á rökstuðning héraðsdóms, en sá málskostnaður sem ferðaskrifstofunni var gert að greiða vegna málanna var lækkaður, úr samtals 1,5 milljón króna í eina milljón.


Tengdar fréttir

Ferðaskrifstofa Íslands dæmd til að endurgreiða skíðaferð vegna Covid-19

Héraðsdómur Reykjaness dæmdi á dögunum að stórfjölskyldu hafi verið heimilt að afpanta skíðaferð til Madonna Di Campiglio á Ítalíu með dagsfyrirvara. Ferðaskrifstofan var dæmd til að endurgreiða 2,6 milljónir króna. Um er að ræða þrjú dómsmál sem rekin voru samhliða.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.