Bensínlítrinn hefur hækkað á ný

Á síðunni gasvaktin.is, sem sækir verð á eldsneyti hjá flestum olíufélögum, mátti eftir virðisaukaskattslækkunina sjá að verð hefði lækkað eftir virðisaukaskattsbreytinguna um 26 til 27 krónur lítrinn á bensíni og dísil um 30 til 32 krónur. Sú hækkun virðist nú hafa skilað sér til baka.

Samkvæmt síðunni er bensínið enn ódýrast hjá Costco, en þar þarf meðlimakort til að versla. Athygli vekur að hjá þeim hefur bensínlítrinn ekki hækkað frá því í gær, hann er enn skráður á 191,1 krónu eins og í gær.

Lítrinn var í gær annars ódýrastur hjá Orkunni á 201 krónu. Í dag er hann á 224,7 krónur. Hjá Atlantsolíu var hann í gær á 201,2 krónur en er nú á 224,8 krónur. Hjá ÓB var lítrinn í gær á 201,3 krónur en er nú á 224,9 krónur. Hjá N1 var lítrinn í gær víða á 202 krónur en er nú á um 225,6 krónur.

Verðið er annað ef skoðað er á landsbyggðinni. Til dæmis var lítrinn í gær á 216 krónur hjá Orkunni í Stykkishólmi og á 225,3 hjá ÓB á Ísafirði. Í dag er hann, til dæmis, á 242,5 hjá Orkunni í Reykjanesbæ og 252,3 hjá Olís í Borgarnesi.

27 krónu hækkun

Lítrinn af dísil er ódýrastur hjá Costco á 224,3 krónur og hefur ekki hækkað samkvæmt síðunni frá því í gær. Hann var svo ódýrastur í gær á 234,3 krónur hjá Orkunni en er nú á 267,1 krónu ódýrastur. Lítrinn var í gær á 234,4 hjá Atlantsolíu en er nú á 261,9 krónur og hefur þannig hækkað um 27,5 krónur.

Formaður Neytendasamtakanna ræddi hækkunina í kvöldfréttatíma Sýnar í gær þar sem hann sagði samtökin, ásamt fleirum, ætla að fylgjast með því að hækkunin yrði ekki meiri en sem nemur virðisaukanum. Viðtalið er hægt að horfa á að neðan.

Virðisaukaskatturinn var í maí lækkaður úr 24 prósentum í 11 prósent út sumarið eða til 31. ágúst samkvæmt tímabundinni heimild sem gefin var í lögum sem samþykkt voru á Alþingi í maí.

Samkeppniseftirlitinu var í kjölfarið falið að fylgjast með því að lækkunin skilaði sér að fullu til neytenda. Í umræðuskjali Samkeppniseftirlitsins, sem gefið var út í byrjun júlí, kom fram að ekki væri hægt að fullyrða að virðisaukaskattslækkun eldsneytis hefði í öllum tilvikum skilað sér að fullu í endanlegu útsöluverði. Þar kom einnig fram að ýmsum spurningum væri enn ósvarað. Einhver olíufélög hækkuðu verðið dagana fyrir gildistöku skattalækkunarinnar.