„Hvernig réttlætir félagsmálaráðherra að fötluðum manni hafi verið sparkað úr landi gagngert til að koma í veg fyrir að hann gæti sótt réttlæti fyrir dómstólum?“ spurði Andrés í óundirbúnum fyrirspurnartíma.
Fjölmenn mótmæli hafa farið fram vegna umdeildrar fjöldabrottvísunar sem varð í skjóli nætur í síðustu viku.
Guðmundur Ingi sagðist þegar hafa gagnrýnt hvernig lögregla stóð að framkvæmdinni brottvísunarinnar og bent á að hvorki hafi verið notuð bifreið við hæfi né hafi réttargæslumaður hans verið viðstaddur.
„Eftir að hafa gagnrýnt þessa framgöngu lögreglunnar og sagt að mér finnist hún ekki ásættanleg – þó ég viti vel að lögreglan er að reyna að gera þessi mál af eins mikilli kostgæfni og næmni og þeim mögulegast er hægt vegna þess að þetta er ekkert auðvelt fyrir þau heldur – að þá er maður gagnrýndur fyrir það að gagnrýna framkvæmdina. Gott og vel, þá skulum við ræða það hvers vegna verið er að senda fólk yfir höfuð til Grikklands því það er kannski mergur málsins. Þar má kannski benda á að það er niðurstaða Útlendingastofnunar og kærunefndar útlendingamála og meira að segja dómstóla í einhverjum tilfellum sem hafa sagt að endursendingar til Grikklands brjóti ekki gegn Mannréttindasáttmála Evrópu eða 42. grein útlendingalaga.“
Eftir að hafa hlustað á svar ráðherrans virðist hafa fokið í Andrés sem tók til máls að nýju og barði í borðið.
„Ráðherranum finnst eitthvað óþægilegt við að vera gagnrýndur fyrir að hafa bara gagnrýnt framkvæmdina sem vissulega var fullkomlega óboðleg og eitthvað sem á ekki að sjást til í siðuðu samfélagi en stóri glæpurinn í þessu er brottvísunin sjálf. Það er nú ágætt að heyra að talpunktar Jóns Gunnarssonar hafa náð eyrum ráðherrans frekar en til dæmis mótmæli Þroskahjálpar.“
Benti Andrés á að hinn 18. nóvember á að taka fyrir mál Husseins.
„Maður hefði haldið að ef ráðherrann hefði snefil af metnaði fyrir málefnum fatlaðs fólks á myndi hann vilja fá niðurstöðu í þetta umdeilda mál. Hann myndi vilja fá að vita hvernig lögin liggja frekar en að sparka þessum einstaklingi úr landi til þess akkúrat að koma í veg fyrir að dómstólar sýni hvað er rétt og hvað ekki, í staðinn velur ráðherrann að Jón Gunnarsson sé sá sem hafi rétt fyrir sér í þessu máli.“
Kærunefnd útlendingamála sé ekki endapunkturinn þó að Jón Gunnarsson segði það benti Andrés á. „Félagsmálaráðherra þarf að átta sig á því ef hann ætlar að vera starfi sínu vaxinn.“
Guðmundur Ingi áréttaði að hann talaði ekki út frá neinum umræðupunktum sem dómsmálaráðherra hefði gefið sér.
„Hefur hef ég lesið þá úrskurði sem hér eru um að ræða og er að vitna til þeirra þannig að það sé nú alveg á hreinu. Auðvitað er þetta mál óskaplega erfitt og það er erfitt að vita til þess að fólk hafi verið sent úr landi áður en að mál þeirra er tekið fyrir hjá dómstólum. Ég held að við getum öll verið sammála um það. Ég verð hins vegar að segja það að ég vissi ekki að þetta væri að fara að gerast fyrr en að það gerðist og vil bara meina að við þurfum að vanda okkur alveg gríðarlega í þessum málum bæði þegar kemur að brottflutningi - því við erum með kerfi sem er þannig að við tökum ekki á móti öllum við vitum það - og sérstaklega þegar um fatlað fólk er að ræða og þá umræðu þurfum við að sjálfsögðu að taka og það ætla ég að gera með lögreglunni.“
