Skúli Hrafn tekur við störfum á eignastýringarsviði LSR með áherslu á innlend hlutabréf og skuldabréf.
Hann hefur starfað innan Kviku samstæðunnar allt frá árinu 2008 og var áður meðal annars sjóðstjóri blandaðra sjóða hjá Kviku eignastýringu frá 2015 til 2019. Þá var Skúli Hrafn, sem er með BA-gráðu í hagfræði frá Háskóla Íslands ásamt því að hafa lokið prófi í verðbréfaviðskiptum, forstöðumaður eigin viðskipta MP banka um nokkurra ára skeið.
Í árslok 2021 var LSR, sem er á meðal stærstu hluthafa í flestum innlendum félögum í Kauphöllinni, með eignir í stýringu að fjárhæð um 1.350 milljarða króna. Sjóðurinn var með um 10 prósenta hreina raunávöxtun í fyrra en síðustu fimm ár hefur raunávöxtun LSR verið að meðaltali um 8,3 prósent.
Fyrr í haust var Halla Kristjánsdóttir ráðin sem nýr forstöðumaður eignastýringar LSR, eins Innherji greindi fyrst frá, en hún tók við starfinu af Birni Hjaltested Gunnarssyni sem hafði stýrt sviðinu allt frá árinu 2015.
Brotthvarf Skúla Hrafns frá Kviku eignastýringu kemur skömmu eftir að Þorkell Magnússon hætti sem forstöðumaður sjóðastýringar félagsins og réð sig yfir til SIV eignastýringar, nýs sjóðastýringarfélags sem var stofnað af VÍS, í september síðastliðnum. Þá hætti einnig Agnar Tómas Möller, sem hafði farið fyrir skuldabréfasjóðum Kviku eignastýringar, störfum hjá félaginu síðasta sumar.
Klinkið er vettvangur Innherja þar sem dregin er upp mynd og veitt innsýn í bakherbergi viðskipta, stjórnmála og atvinnulífs á landinu.
