Handbolti

Íslendingaliðin Gummersbach og Melsungen unnu örugga sigra

Hjörtur Leó Guðjónsson skrifar
Hákon Daði Styrmisson í leik með Gummersbach.
Hákon Daði Styrmisson í leik með Gummersbach. Getty Images

Íslendingaliðin Gummersbach og MT Melsungen unnu örugga sigra í leikjum sínum í þýska handboltanum í kvöld. Gummersbach vann góðan fjögurra marka sigur gegn Minden, 26-22, og MElsungen vann tíu marka útisigur gegn Hamm-Westfalen, 18-28.

Gummersbach náði fljótt upp öruggri forystu gegn botnliði Minden í kvöld of lét hana aldrei af hendi. Liðið leiddi með þremur mörkum í hálfleik, 10-7, og vann að lokum góðan fjögurra marka sigur, 26-22.

Elliði Snær Viðarsson skoraði fimm mörk fyrir Gummersbach í kvöld og Hákon Daði Styrmisson tvö. Guðjón Valur Sigurðsson þjálfar liðið, en Gummersbach situr nú í áttunda sæti deildarinnar með 11 stig eftir níu leiki, en Minden er enn án stiga á botninum.

Þá unnu Arnar Freyr Arnarsson, Elvar Örn Jónsson og félagar þeirra afar sannfærandi tíu marka sigur gegn Hamm-Westfalen, 18-28.

Arnar Freyr skoraði fjögur mörk fyrir Melsungen og Elvar Örn eitt, en þetta var annar sigur liðsins í röð sem nú situr í tíunda sæti með átta stig. Hamm-Westfalen situr hins vegar í næst neðsta sæti með aðeins tvö stig.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.